30.07.2026 | 17:50
Ինչպե՞ս են փոխվել ծաղկի, ծիրանի և այլ ապրանքների գները ՌԴ սահմանափակումներից հետո
«2 ասորական գյուղեր ոչնչացման եզրին են». Տերտերյանը հորդորեց դիսկրիմինացիոն ֆոն չստեղծել. ՏԵՍԱՆՅՈՒԹ
Քաղաքականություն
22.09.2021 | 13:24
«ՀՀ ազգային անվտանգության ռազմավարության փաստաթղթում կա բաժին, որտեղ կետերից մեկում նշված է, որ ՀՀ-ն կարևորում է համամարդկային ու ազգային արժեքները, ազգային, հոգևոր ու մշակութային ժառանգության պահպանման և դրանց վերարտադրության ու զարգացման համար նպաստավոր պայմանների ստեղծումը: Դա միայն ՀՀ ազգությամբ հա՞յ քաղաքացիներին է վերաբերում»,- «Հայաստանի Հանրապետության վարչատարածքային բաժանման մասին» օրենքում փոփոխությունների նախագծի վերաբերյալ ԱԺ-ում կազմակերպված լսումների ժամանակ ՀՀ տարածքային կառավարման ու ենթակառուցվածքների նախարարի տեղակալ Վաչե Տերտերյանին այս հարցն ուղղեց ասորական համայնքի ներկայացուցիչ Իրինա Գասպարյանը:
Նրա դիտարկմամբ՝ համայնքների խոշորացման ծրագրում ազգային փոքրամասնությունների շահերի պահպանման մասին կետ գոյություն չունի: «Անտեսել եք, ոտնահարել եք ազգային փոքրամասնությունների իրավունքները: Երկու ասորական գյուղեր ոչնչացման եզրին են համայնքների խոշորոացման ծրագրի իրականացման հետևանքով»,-նշեց Գասպարյանը:
Վաչե Տերտերյանը չհամաձայնեց հնչած որակումների հետ՝ նշելով, որ դրանք իրականությանը չեն համապատասխանում և խնդրեց այսուհետև սեփական պատկերացումներն այդպես չարտահայտել․ «Այդպես չի, չի կարելի նման բան ասել։ Մի ամբողջ շարք բնակավայրերի հետ խնդիրներ ունենք, և ես այդ մասին խոսելիս ազգություն չեմ հիշատակել։ Որոշ դեպքերում բացառություններ ենք արել եւ ազգային փոքրամասնությունների համայնքները դեռ չենք ընդգրկել միավորման ցանկում։ Պետք չէ իրավիճակը դրամատիզացնել։ Որևէ մեկի մտքով չի անցել որևէ համայնքի ոչնչացումը, հատկապես՝ ձեր ասած գյուղերի։ Խոշորացումն ի՞նչ կապ ունի հայկական կամ ասորական գյուղի տեսլականի հետ։ Ավանդույթների կամ լեզվի մասին առանձին է պետք խոսել, որովհետև, այո, խնդիրներ ունենք։ Ազնիվ չէ։ Մենք ձեր հետ միշտ բաց ենք եղել քննարկումներում»։
Տերտերյանը հորդորեց դիսկրիմինացիոն ֆոն չստեղծել:
Մանրամասները՝ տեսանյութում:
