Քաղաքականություն
22.09.2021 | 14:09
Ֆրանսիայի, ԱՄՆ-ի, Մեծ Բրիտանիայի և Գերմանիայի ԱԳ նախարարների հանդիպումը Նյու Յորքում ՄԱԿ-ի Գլխավոր ասամբլեայի շրջանակում ձախողվել է՝ Հնդկախաղաղօվկիանոսյան տարածաշրջանում անվտանգության նոր դաշինքի շուրջ վեճի պատճառով, հաղորդում է DPA-ը:
Գերմանիայի ԱԳ նախարար Հայկո Մաասի խոսքով՝ իր ֆրանսիացի գործընկերը հրաժարվել է հանդիպումից, որը նախատեսված էր սեպտեմբերի 22 -ին: Նա հավելել է, որ միջոցառումը ոչ թե չեղարկվել է, այլ հետաձգվել:
«Պատճառը ֆրանսիական կողմի դժգոհությունն է, որը ես կարող եմ հասկանալ, և որ որոշ բաներ նախ պետք է կարգավորվեն՝ մինչ մենք միասին կզրուցենք այս ձևաչափով»,- ասել է Մաասը:
Հիշեցնենք, որ ԱՄՆ-ի, Մեծ Բրիտանիայի և Ավստրալիայի միջև AUKUS նոր դաշինքը, որը ստորագրվել է սեպտեմբերի 15-ին, առաջացրել է խոր դիվանագիտական ճգնաժամ Վաշինգտոնի և Փարիզի միջև: Դաշինքի կազմում Ավստրալիան կհամալրվի միջուկային սուզանավերով: Այս պայմանագրի պատճառով Ավստրալիան հրաժարվել է 66 միլիարդ դոլար արժողությամբ սուզանավերի ձեռքբերման վերաբերյալ ֆրանսիական ընկերության հետ պայմանագրից, ինչը զայրացրել է Փարիզին:
Տաթև Ֆռանգյան
