16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ՄԱԿ-ում Էրդողանը կրկին հայտարարել է Ղրիմի բռնակցումը չճանաչելու մասին․ ՌԴ-ից հալվայի մասին ասացվածքով են պատասխանել
Քաղաքականություն
22.09.2021 | 15:08
Թուրքիայի նախագահ Թայիփ Էրդողանը, ելույթ ունենալով ՄԱԿ-ի Գլխավոր վեհաժողովի 76-րդ նստաշրջանին, կրկին Անկարայի հստակ աջակցությունն է հայտնել Ուկրաինայի տարածքային ամբողջականությանը։
«Մենք մեծ նշանակություն ենք տալիս Ուկրաինայի ինքնիշխանությանն ու տարածքային ամբողջականությանը՝ ներառյալ Ղրիմը, որի բռնակցումը մենք չենք ճանաչում»,- Էրդողանի խոսքերն է մեջբերում «Անադոլու» գործակալությունը։
Ավելի վաղ Թուրքիայի ԱԳՆ-ն հայտարարել էր, որ Ղրիմում ընտրություններն անօրինական են: Անկարան հրաժարվում է ճանաչել թերակղզում ռուսական ընտրությունները, քանի որ անօրինական է համարում դրա միացումը ՌԴ-ին։
Մինչ Ուկրաինայի նախագահ Վլադիմիր Զելենսկին ԱՄՆ-ում Էրդողանի հետ հանդիպման ժամանակ նրան շնորհակալություն է հայտնել Ղրիմի բռնակցման մասին խոսելու համար, Ռուսաստանում հալվայի մասին ասացվածքով են պատասխանել թուրք ղեկավարին։
«Ռուսական մի ասացվածք հիշեցի․ «Ինչքան էլ ասես՝ «հալվա», բերանդ չի քաղցրանա։ Ինչքան էլ Էրդողանն ասի, որ Ղրիմը բռնակցվել է Ռուսաստանի կողմից, որ նրանք չեն ճանաչում և այլն, իրավիճակը ոչ մի կերպ չի փոխվում։ Էրդողանը պետք է իրական հայացք նետի իրավիճակին և հասկանա, թե որքան կարևոր է Ղրիմը Ռուսաստանի համար: Ղրիմը դարեր շարունակ ասոցացվել է Ռուսաստանի հետ և հանդիսանում է ռուս մեծ ուղղափառության օրրանը: Սա այն տարածաշրջանն է, որտեղ ապրել և ապրում է ռուսների ճնշող մեծամասնությունը և գտնվում է Սևծովյան նավատորմի հիմնական ռազմաբազան», – «ՌԻԱ Նովոստի»-ի հետ զրույցում հայտարարել է ՌԴ Դաշնային խորհրդի միջազգային կոմիտեի անդամ Սերգեյ Ցեկովը:
Տաթև Ֆռանգյան
