Լեհաստանը լրացուցիչ զորք և զինտեխնիկա կտեղակայի Բելառուսի հետ սահմանին

Լեհաստանի իշխանությունները լրացուցիչ զորք և զինտեխնիկա կտեղակայեն Բելառուսի հետ սահմանին՝ անօրինական միգրանտների հոսքից պաշտպանվելու համար: Այս մասին հայտարարել է Լեհաստանի վարչապետ Մաթեուշ Մորավեցկին, գրում է korrespondent-ը:

«Մենք գործ ունենք Մինսկի և Մոսկվայի կողմից լավ կազմակերպված գործողությունների հետ»,- հայտարարել է նա մամուլի ասուլիսի ժամանակ և վստահեցրել, որ իշխանությունները «լիակատար վճռականությամբ» կպաշտպանեն Լեհաստանի սահմանը:

Իր հերթին, Լեհաստանի ներքին գործերի և կառավարման նախարար Մարիուշ Կամինսկին ասել է, որ այս շաբաթ Բելառուսի հետ սահման կուղարկվի ևս 500 զինծառայող և ութ միավոր ռազմական տեխնիկա:

Մորավեցկին և Կամինսկին կարծում են, որ Բելառուսի իշխանություններն առանց վիզայի ռեժիմ են սահմանել Մերձավոր Արևելքի որոշ երկրների հետ, որոնք «միգրացիոն ներուժ» ունեն՝ միգրանտներին գրավելու և նրանց Լեհաստան ու Լիտվա ուղարկելու համար:

Լեհաստանի վարչապետը նշել է, որ մշտապես աճում է բելառուսա-լեհական սահմանը հատելու անօրինական փորձերի թիվը: Տարեսկզբից Լեհաստանի սահմանը բելառուսական կողմից ապօրինաբար հատելու ավելի քան 8․000 փորձ է գրանցվել, այդ թվում՝ միայն սեպտեմբերի սկզբից՝ ավելի քան 3․800 փորձ:

Հիշեցնենք, որ սեպտեմբերի 19-ին Լեհաստանի տարածքում՝ սահմանամերձ գոտու տարբեր հատվածներում, հայտնաբերվել է երեք զոհված ներգաղթյալի մարմին, որոնցից մեկը՝ Իրաքի քաղաքացու: Նույն օրը Բելառուսի Պետական սահմանային կոմիտեն և Քննչական կոմիտեն հայտնեցին, որ սահմանի բելառուսական կողմում հայտնաբերվել է Իրաքի քաղաքացի հանդիսացող 39-ամյա մեկ այլ կնոջ մարմին։ Այս մահերի պատճառը, ըստ նախնական վարկածը, հիպոթերմիան է:

Տաթև Ֆռանգյան