Ջո Բայդենն ու Անտոնիո Գուտերեշը քննարկել են համաճարակին, կլիմայի փոփոխությանը և հակամարտությունների կանխմանն առնչվող հարցեր

ԱՄՆ նախագահ Ջո Բայդենը և ՄԱԿ-ի գլխավոր քարտուղար Անտոնիո Գուտերեշը երկուշաբթի կայացած հանդիպմանը քննարկել են կորոնավիրուսային համաճարակի դեմ պայքարին, առողջության դեմ նոր սպառնալիքներին նախապատրաստվելուն, կլիմայի փոփոխության դեմ պայքարին և հակամարտությունները կանխելու ջանքերին վերաբերող հարցեր: Այս մասին ասված է Սպիտակ տան մամուլի ծառայության տարածած հաղորդագրությունում:

Փաստաթղթում նշվում է, որ Բայդենն ոււ Գուտերեշը Նյու Յորքում ՄԱԿ-ի Գլխավոր վեհաժողովի շրջանակում կայացած հանդիպմանը «վերահաստատել են ԱՄՆ-ի և ՄԱԿ-ի սերտ գործընկերությունը, որը, մասնավորապես, հիմնված է ընդհանուր արժեքների վրա», ներառյալ՝ հարգանքը մարդու համընդհանուր իրավունքների, հիմնարար ազատությունների և միջազգային իրավունքի նկատմամբ:

Բացի այդ, նրանք նշել են, որ «բազմակողմանիությունը, ժողովրդավարության պաշտպանությունը և կանոնների վրա հիմնված միջազգային կարգը» առանցքային դեր են խաղում մեր ժամանակների հիմնական մարտահրավերները հաղթահարելու գործում:

Նրանք նաև քննարկել են «համատեղ աշխատանքի անհրաժեշտությունը» այլ երկրների և ՄԱԿ-ի հետ՝ «կորոնավիրուսային համաճարակին վերջ դնելու, առողջության դեմ ապագա սպառնալիքներին պատրաստվելու, կլիմայի փոփոխության դեմ պայքարի, սննդի անվտանգության ամրապնդման և մարդասիրական կարիքների բավարարման, հակամարտությունների կանխարգելման և մեղմացման, մարդու իրավունքներն ամբողջ աշխարհում պաշտպանելու համար»։ Բայդենը նշել է «ՄԱԿ-ի բացառիկ դերը բոլորի բարգավաճման, խաղաղության և անվտանգության ապահովման գործում»:

Հավելենք, որ Գուտերեշն ու Բայդենն այսօր ելույթ են ունենալու ՄԱԿ-ի Գլխավոր վեհաժողովի քաղաքական քննարկումների ընթացքում։

Տաթև Ֆռանգյան