«Ցածր անվտանգության պայմաններում ժողովրդավարությունը ոչ մեկին հետաքրքիր չէ». ՀՀԿ-ական պատգամավորը Սերժ Սարգսյանի վարչապետ դառնալու առիթով. ՏԵՍԱՆՅՈՒԹ

Գալուստ Սահակյանը երկար հույսեր է ունեցել, որ ընդդիմությունն այնքան կկատարելագործվի, որ կունենա վարչապետ և Սերժ Սարգսյանը կմնա իր խոսքի տերը. «Ո՞վ լինի երկրի վարչապետ, ասե՛ք»։ Սակայն պատգամավորն իմանալով, որ Սերժ Սարգսյանն ինքն էլ չի հրաժարվում վարչապետ դառնալ, չգիտի, թե քաղաքական ինչ ենթատեքստով է Ս․ Սարգսյանը 4 տարի առաջ ասել, որ եթե սահմանադրական բարեփոխումներն անցնեն, ինքը չի հավակնի նաև վարչապետի պաշտոնին։

Պարոն Սահակյանը գիտի միայն մեկ բան՝ այդ մարդն օդ ու ջրի պես է պետք մեր երկրին. «Մոտեցումները նաև մեր հետագա ճակատագրին, այն ելքերը, որոնք տեսնում է մեր ազգային էս պատկանելությունը՝ կանխորոշիչ դրվագներով, էս ամեն ինչը ավելի լավագույն ձևով պատկերացնում է Սերժ Սարգսյանը»։

Պարոն Սահակյանը համաձայն չէ, որ գործող նախագահը վարչապետ չդառնալու խոստում տալով խաբել է սահմանադրական փոփոխություններին կողմ քվեարկող մարդուն․ այն ժամանակ պետք էր այդպիսի հայտարարություն անել: «Այս պահին, երբ արդեն մոտեցումը այնպիսին է, որ Սերժ Սարգսյանը կարող է լինել երկրի վարչապետ, դա չի գալիս նրանից, որ նա ուզում է անպայման վարչապետ դառնալ»։

ՀՀ ԱԺ ՀՀԿ խմբակցության քարտուղար Գագիկ Մելիքյանը գիտի, թե ինչ է ցանկացել ասել Սերժ Սարգսյանը, երբ հայտարարել է, որ սահմանադրական փոփոխությունների ընդունվելու դեպքում ինքը չի հավակնի վարչապետի պաշտոնին։

«Արտահայտել է այն մտքերը, ինչ որ ցանկացել է ասել։ Եվ շատ հստակ, շատ պարզ ու շատ ընկալելի»,- ասում է պարոն Մելիքյանը։

Մինչդեռ 4 տարի առաջ ապրիլին Սերժ Սարգսյանն ասել էր․ «Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման ուղին, ապա ես չեմ հավակնի նաև վարչապետի պաշտոնին։ Վստահ եմ անգամ, որ մեկ մարդը երկու անգամից ավել իր կյանքում չպետք է հավակնի երկրի կառավարման ղեկին Հայաստանում»։

Որտե՞ղ է գործող նախագահի այս մտքի ենթատեքստը։ Գագիկ Մելիքյանը բաց տեքստով է ասում՝ այնպիսի բան չի ասել, որ չհասկանանք։ Մարդը պարզ է ասում՝ չեմ հավակնում։

Այդ դեպքում ո՞վ է հավակնում դառնալ Հայաստանի վարչապետ․ «Դա արդեն կախված է այն որոշումից որ կկայացնի պարոն նախագահի կուսակցությունը, որը ղեկավարում է ինքը»։

Սերժ Սարգսյանը երեկ ակնարկել է նաև, որ դառնալու է վարչապետ, որովհետև երկրի անվտանգությունը կարևոր է։

-Ապրիլյան պատերազմում 800 հեկտար կորցնելուց հետո ի՞նչ անվտանգություն նկատի ունի Հանրապետականի ղեկավարը:

-Ոչ մի տարածք էլ չի գրավվել։

-800 հեկտար գրավել են։

-800 հեկտարը պատերազմական գործողությունների ընթացքում, առավելևս՝ չավարտված պատերազմի պայմաններում, տարածքների գրավում չէ։

Պարոն Մելիքյանը ոչ մի ածական չի խնայում բնորոշելու համար, թե ինչքան կարևոր է Սերժ Սարգսյանի վարչապետ դառնալը, նույնիսկ ժողովրդավարությունն է խամրում Հայաստանի ամենաանփոխարինելի մարդու առջև։

«Ցածր անվտանգության մակարդակ ունենալու պայմաններում, երբ ամեն պահ մեր հարևանների, մեզ թշնամի համարվող երկրի կողմից հնարավոր է հարձակում մեր երկրի վրա, ձեր ասած ժողովրդավարությունը, կարծում եմ, ոչ մեկին չի էլ հետաքրքրում»,- թեման փակում է ՀՀԿ խմբակցության քարտուղարը։

Մհեր Արշակյան