29.06.2026 | 15:40
Սեդա Սաֆարյանի հարցադրումը պնդո՞ւմ էր. հարց Սուրեն Գրիգորյանին․ ՏԵՍԱՆՅՈՒԹ
«Ողբերգական սխալ»․ Պենտագոնը խոստովանել է, որ Քաբուլում ԱՄՆ-ի հրթիռային հարվածի հետևանքով 10 խաղաղ բնակիչ է զոհվել
Քաղաքականություն
18.09.2021 | 18:32
Ամերիկացի զինվորականները ներողություն են խնդրել և ողբերգական սխալ են համարել Քաբուլի բնակելի թաղամասում ավտոմեքենային ավիահարվածը, որի հետևանքով ահաբեկիչների փոխարեն խաղաղ աֆղանցիներ են զոհվել: ՏԱՍՍ-ի հաղորդմամբ՝ այս մասին հայտարարել է ԱՄՆ Զինված ուժերի կենտրոնական հրամանատարության ղեկավար, գեներալ Ֆրենկ Մակքենզին։
«Ես այս պահին վստահաբար կարող եմ ասել, որ առնվազն 10 քաղաքացիական անձ, այդ թվում ՝ շուրջ յոթ երեխա, ողբերգական կերպով սպանվել է այդ հարվածի հետևանքով»,- ասել է Մակքենզին:
Խոսքը օգոստոսի 29-ին քաոսի մթնոլորտում տեղի ունեցած հարձակման մասին է։ Անօդաչու թռչող սարքից արձակված հրթիռի զոհ է դարձել 10 խաղաղ քաղաքացի, այդ թվում՝ յոթ երեխա: Ի սկզբանե ամերիկացիները պնդում էին, որ ոչնչացրել են ահաբեկիչներին, որոնք ծրագրում էին գրոհել Քաբուլի օդանավակայանը։ Հետո պարզվել է, որ սխալմամբ հարվածի թիրախ է դարձել աֆղանցին, որն աշխատել է ամերիկյան բարեգործական կազմակերպությունում և հույս ուներ ապաստան ստանալ ԱՄՆ-ում:
«Իմ խորին ցավակցությունն եմ հայտնում զոհվածների ընտանիքներին և ընկերներին։ Այս հարվածը հասցվեց անկեղծ հավատով, որ այն կկանխի անխուսափելի վտանգը, որը սպառնում էր մեր ԶՈՒ-ին և օդանավակայանում տարհանվածներին։ Բայց դա սխալ էր։ Եվ ես անկեղծ ներողություն եմ խնդրում։ Որպես մարտական գործողությունների հրամանատար՝ ես լիակատար պատասխանատվություն եմ կրում այդ ողբերգության համար»,- ասել է Մակքենզին։
