19.11.2024 | 14:16
Չունենք բավարար քանակի հետազոտություններ, որոնք տնտեսության զարգացմանը նպաստեն․ ԲՈԿ նախագահ․ ՏԵՍԱՆՅՈՒԹ
Գորիս-Կապան ավտոճանապարհը երկու տեղում դուրս է գալիս Խորհրդային Հայաստանի վարչական սահմանից․ Փաշինյան. ՏԵՍԱՆՅՈՒԹ
Քաղաքականություն
15.09.2021 | 17:39
Գորիս – Կապան ճանապարհին ինչո՞ւ է ադրբեջանական ոստիկանական անցակետ բացվել և ինչո՞ւ են Հայաստան եկող իրանական տրանսպորտային միջոցներից «մաքսատուրքեր» գանձվում: Կառավարության հետ հարցուպատասխանի ժամանակ «Քաղաքացիական պայմանագիր» խմբակցության պատգամավոր Արմեն Խաչատրյանն այս հարցը բարձրաձայնեց, որին պատասխանեց ՀՀ վարչապետ Նիկոլ Փաշինյանը:
«Իրադարձությունները, որոնք տեղի են ունենում հայ ադրբեջանական սահմանագծի երկայնքով, ունեն բազմաթիվ շերտեր և ենթատեքստեր, շատ կարևոր է դրանք ճիշտ ընկալելը»,- նշեց Փաշինյանը:
«2020 թվականի դեկտեմբերին մենք իրականացրել ենք ՀՀ ԶՈՒ դիրքերը Խորհրդային Միությունից ժառանգած սահմանների հետ համապատասխանեցնելու գործընթաց: Այդ գործընթացն իրականացվել է ռազմական նոր էսկալացիայից խուսափելու համար: Այս համատեքստում ուզում եմ հիշեցնել 2010 թվականին ՀՀ ԱԺ-ի կողմից ընդունված վարչատարածքային բաժանման մասին օրենքը, որտեղ հստակ արձանագրվում է, որ, մասնավորապես, Շուռնուխ և Որոտան գյուղերի վարչական սահմանները համապատասխանում են հայ-ադրբեջանական սահմանին: Տվյալ դեպքում պիտի արձանագրեմ նաև, որ Խորհրդային Միության ժամանակ, մասնավորապես այդ հատվածում, Խորհրդային Հայաստանի և Խորհրդային Ադրբեջանի գոյություն ունեցած վարչական սահմանն է, որը հետագայում վերածվել է պետական սահմանի: Այս իրողությունն է ընդունվել որպես հիմք: Այդ հատվածներում 2 տեղ Գորիս-Կապան ավտոճանապարհը դուրս է գալիս ՀՀ կամ Խորհրդային Հայաստանի վարչական սահմանից: Եվ նաև այս հանգամանքի բերումով է, որ ժամանակին ձեզ հայտնի տեղերում հայտնվել են մեզ հայտնի ցուցանակները և հենակետերը»,- ասաց Փաշինյանը:
Նրա խոսքով՝ 2020 թ. դեկտեմբերին պայմանավորվածություն է ձեռք բերվել, որ այդ ճանապարհն անարգել պետք է օգտագործվի ՀՀ տրանսպորտային միջոցների և բեռների տարանցման համար:
«Ենթադրում եմ, քանի որ այդ պայմանավորվածության մեջ չի ֆիքսվել նաև օտարերկրյա բեռների հանգամանքը, տվյալ իրավիճակում Ադրբեջանը կիրառում է այդ միջոցը՝ թերևս ի պատասխան մեր այն հայտարարությունների, որ թե՛ նոյեմբերի 9-ի, թե՛ հունվարի 11-ի եռակողմ հայտարարությունների մեջ հիշատակված չէ ՀՀ տարածքով միջանցք տրամադրելու վերաբերյալ դրույթ, և ՀՀ-ն ընդունելով, որ տարածաշրջանի կոմունիկացիաները պետք է բացվեն, այնուամենայնիվ, արձանագրում են, որ օտարերկրյա բեռները ՀՀ տարածքը հատելիս, այդ թվում՝ Ադրբեջանի արևմտյան շրջաններից դեպի Նախիջևանի Ինքնավար Հանրապետություն գնալիս, պետք է հատեն մաքսային, անձնագրային և այլ կետեր, ինչպես սահմանված է ԱՊՀ երկրների միջև տրանսպորտային հաղորդակցությունն ապահովող իրավական բազայում»,- նշեց վարչապետը:
Մանրամասները՝ տեսանյութում:
