Քննիչ հանձնաժողովը պետք է գնահատական տա պատերազմի ընթացքում պետական ապարատի գործունեությանը. Օհանյան. ՏԵՍԱՆՅՈՒԹ

Ես դեմ եմ հրապարակավ քննարկել մարտական գործողությունների ընթացքը: Այս մասին, այսօր ԱԺ-ում լրագրողների հետ զրույցում նշեց «Հայաստան» խմբակցության ղեկավար, պաշտպանության նախկին նախարար Սեյրան Օհանյանը:

«Առավել վատ է, որ ցույց են տալիս ինչ-որ քարտեզներ: Դրանք ռազմական գաղտնիքներ են: Այդ ամենի վերլուծությունը պետք է ՊՆ-ն իրականացնի: ՊՆ-ի կարողությունների, գործողությունների, մարտավարության ռազմավարության մասին համապատասխան եզրակացություն կարող է կազմել նաև հակառակորդը: Խորհուրդ եմ տալիս ՊՆ-ի, ԱԱԾ-ի ղեկավարությանը համապատասխան միջոցներ ձեռնարկել, նաև ԶԼՄ-ներին կոչ եմ անում տալիս պահել ռազմական էթիկետի նորմերը: Ես կողմ եմ, որ քննարկումները լինեն ՊՆ-ում: Եթե իրենք գտնում են, որ անհրաժեշտ է նաև այն տեղեկությունը, որը ես ունեմ, թող հրավիրեն, ես պատրաստ եմ մասնակցելու:  Ես կողմ եմ նման խնդիրները քննարկել գաղտնիության թույլտվության շրջանակներում, քննիչ հանձնաժողովներում»,- հայտարարեց Օհանյանը:

Անդրադառնալով քննիչ հանձնաժողովի ստեղծմանը՝ Օհանյանն ընդգծեց, որ իշխանությունները ունեն բոլոր լծակները ամբողջ իրողությունը բացահայտելու համար։ Նա նաև ընդգծեց, որ հույսը դնել միայն քննիչ հանձնաժողովի վրա, ճիշտ չէ. «Այսօր խոսվում է Զինված ուժերի բարեփոխումների ու զարգացման մասին, այն պետք է իրականացվի ստեղծված ռազմաքաղաքական իրավիճակի հստակ գնահատականի հիման վրա: Այսինքն՝ պետք է գնահատել սպառնալիքները և դրանից ելնելով՝ որոշել, թե  որոնք են այն դերակատարները և նրանց խնդիրները, որոնք պետք է ՀՀ պաշտպանական քաղաքականության մաս կազմեն: Եթե պաշտպանական ռազմավարության վերանայում տեղի չի ունեցել, դա նշանակում է ոչ լիարժեք ծրագրեր կազմել ԶՈւ բարեփոխումների մասին»:

«Պետական ապարատը ունի հնարավորություններ քննելու, գնահատական տալու և կազմելու մեր ռազմավարությունը և մարտավարությունը՝ անվտանգային համակարգը ձևավորելու համար, իսկ քննիչ հանձնաժողովը պետք է գնահատական տա պատերազմի ընթացքում պետական ապարատի գործունեությանը»,- ընդգծեց Օհանյանը:

Մանրամասները՝ տեսանյութում: