Տեսանյութեր
13.09.2021 | 12:29ՀՀ բարձրաստիճան որևէ պաշտոնյա Արցախի Հանրապետության անկախության 30-ամյակին չգնաց Արցախ։ Այս մասին ԱԺ նիստում նշեց ԱԺ «Հայաստան» խմբակցության պատգամավոր Արեգնազ Մանուկյանը։
«Փոխարենը Ձեզ և ՔՊ-ի ևս երկու պատգամավորի տեսանք հունական կղզում՝ ուրախ ժամանց անցկացնելիս»,- դիմելով ԱԺ նախագահ Ալեն Սիմոնյանին՝ նշեց Մանուկյանը:- Պատերազմի զոհերի, անհետ կորածների ու գերիների հարազատների հետ հանդիպման ժամանակ նշում էիք՝ շատ ծանր եք տանում այդ ամենը, գիշեր-ցերեկ մտածում եք միայն այդ մասին, բայց, փաստորեն, շատ բարձր տրամադրությամբ հանգիստ եք անցկացրել Հունաստանում՝ որպես Հայաստանի բարձրաստիճան պաշտոնյա։ Արդյոք Արցախ չմեկնելու պատճառն Ալիևի արգելքն ու գերի ընկնելու վա՞խն է, թե՞ կան այլ պատճառներ»:
ԱԺ նախագահն արձագանքեց, որ Արցախ մեկնել է պատվիրակություն, որը եղել է բավականին ներկայացուցչական. «Դրա հետ կապված այլ մեկնաբանություն չեմ անի»:
«Ինչ վերաբերում է իմ անձնական կյանքին և ստերին, ես դրանք չեմ մեկնաբանում»,- նշեց Սիմոնյանը հրաժարվելով մեկնաբանել համացանցում հայտնված տեսանյութը:
«Այստեղ «ստեր» ասելը մի քիչ դժվար է, որովհետև համացանցում կադրեր կան, թե դուք ինչպես եք պարում այդ ծովափնյա հանգստավայրում։ Ու, դատելով ձեր եկամուտնրի հայտարարագրից, դուք և ձեր ընկերները պետք է որ չկարողանայիք այդքան թանկարժեք վայրում հանգստանալ: Տեղեկություններ կան, որ բույքմեյքերական գրասենյակներից մեկի ղեկավարն է ձեր ծախսերը փակել: Իսկ այս դեպքում արդեն գործ ունենք դասական կոռուպցիայի հետ»,- արձագանքեց Մանուկյանը` ԱԺ խոսնակից պահանջելով, որպես երկրի բարձրաստիճան պաշտոնյա՝ հաշվետու լինել հանրությանն ու բացահայտել, թե որքան գումար է ծախսել Հունաստանում։
Մանրամասները՝ տեսանյութում:
