Քաղաքականություն
10.09.2021 | 13:15
ԱՄՆ նախագահ Ջո Բայդենը հավանություն է տվել նոր ծրագրին, որը ենթադրում է երկրում նոր կորոնավիրուսի դեմ պատվաստման մասշտաբների ընդլայնմանն ուղղված քայլեր՝ ինֆեկցիայի տարածման դեմ պայքարի նպատակով, ասված է Սպիտակ տան տարածած հայտարարության մեջ։
Նա նշել է, որ նոր ծրագիրը ենթադրում է ավելի մեծ թվով ամերիկացիների պատվաստում և ուղղված է նրանց դեմ պայքարին, ովքեր արգելափակում են բնակչության առողջության պաշտպանությանն ուղղված միջոցներ։
«Մենք համբերատար էինք, սակայն մեր համբերությունը սպառվում է, և պատվաստվելուց ձեր հրաժարվելը բոլորիս վրա թանկ է նստում», – ասել է Բայդենը՝ նշելով, որ իր ծրագրի համաձայն՝ պետք է ընդլայնվի նաև թեստավորումները, ինչն ապահովելու է երկրի տնտեսության անխափան աշխատանքն ու դպրոցում սովորողների անվտանգությունը։
Ինչպես փաստել է ԱՄՆ նախագահը՝ ծրագիրը ենթադրում է «6 ուղղություններով քայլերի ձեռնարկում»։
«Ժամանակ կպահանջվի, որպեսզի այդ քայլերն ամբողջությամբ արդյունք տան։ Սակայն, եթե մենք դրանք ընդունենք, ապա, կարծում եմ, այդպես են գտնում նաև գիտնականները, մենք կկարողանանք հետագա ամիսներին զգալիորեն նվազեցնել չպատվաստված ամերիկացիների թվաքանակը, հոսպիտալացման ցուցանիշներն ու մահվան ելքով դեպքերը, մեր երեխաները հանգիստ դպրոց կգնան, իսկ տնտեսությունը կկայունանա՝ շնորհիվ այն բանի, որ ընկերությունները կշարունակեն բնականոն աշխատանքը»,- հավելել է Բայդենը։
Տաթև Ֆռանգյան
