11.10.2026 | 10:11
Շանհայ. Կարեն Խաչանովը դուրս եկավ 1/8 եզրափակիչ
Աֆղանստանի նոր կառավարության գրեթե բոլոր անդամները միջազգային հետախուզման մեջ են
Քաղաքականություն
08.09.2021 | 12:48
«Թալիբան» շարժումը երեքշաբթի հրապարակել է Աֆղանստանի ժամանակավոր կառավարության կազմը և երկիրը հռչակել «Իսլամական էմիրություն»: 33 նախարարներից ու նրանց տեղակալներից գրեթե բոլորը կա՛մ ՄԱԿ-ի և առանձին երկրների միջազգային պատժամիջոցների տակ են, կա՛մ հետախուզման մեջ, գրում է BBC-ի ռուսական ծառայությունը:
Երկրի վարչապետի պաշտոնակատար է դարձել Հասան Ախունդը, որը 1996-2001 թվականներին եղել է «Թալիբան»-ի առաջին կառավարության անդամ, իսկ «Թալիբան»-ի մեկ այլ առաջնորդ՝ մոլլա Աբդուլ Ղանի Բարադարը, որին հիշատակում էին որպես վարչապետի թեկնածու, դարձել է Ախունդի տեղակալը։
Ներքին գործերի նախարարությունը կգլխավորի «Հաքքանի ցանց» զինված խմբավորման առաջնորդ Սարաջուդդին Հաքքանին, որին ձերբակալելու հարցում օգնության համար ԱՄՆ ՀԴԲ-ն խոստանում է 5 մլն դոլար:
Թալիբների առաջնորդներից շատերը ժամանակավորապես հեռացվել են ՄԱԿ-ի պատժամիջոցների ցուցակից, որպեսզի նրանք կարողանան մասնակցել միջազգային բանակցություններին և, ամենայն հավանականությամբ, ՄԱԿ-ի Անվտանգության խորհուրդը կերկարաձգի այս ժամանակավոր չեղարկումը:
Հիշեցնենք, որ «Թալիբան» շարժման ներկայացուցիչները Ռուսաստանին, Թուրքիային, Չինաստանին, Իրանին, Պակիստանին և Կատարին հրավիրել են Աֆղանստանի նոր կառավարության կազմը հայտարարելու արարողությանը:
Տաթև Ֆռանգյան
