Քաղաքականություն
07.09.2021 | 18:52
Վլադիմիրի շրջանային դատարանն օրինական է ճանաչել Օկտյաբրսկի շրջանային դատարանի որոշումը, որն ավելի վաղ մերժել էր ռուս ընդդիմադիր գործիչ Ալեքսեյ Նավալնիի հայցն ընդդեմ թիվ 3 ուղղիչ գաղութի, որն արգելել է փաստաբաններին հաստատության տարածք հեռախոս և դյուրակիր համակարգիչ տանել։ Այս մասին գրում է DW-ի ռուսական ծառայությունը։
«Վլադիմիր քաղաքի Օկտյաբրսկի շրջանային դատարանի՝ 2021 թվականի հունիսի 10-ի որոշումն անփոփոխ թողնել, վարչական հայցվոր Ալեքսեյ Անատոլիի Նավալնիի ներկայացուցիչ Կաբզևի բողոքը թողնել առանց բավարարման»,- գործակալությունը մեջբերում է դատավոր Ալեքսեյ Սեմենովի որոշումը:
Նավալնին երկու անգամ հայց է ներկայացրել Վլադիմիրի Օկտյաբրսկի շրջանային դատարան՝ ընդդեմ թիվ 3 ուղղիչ գաղութի վարչակազմի, որտեղ նա գտնվել է ապրիլի կեսերից: Երկու դեպքում էլ դատարանը որոշում է կայացրել հօգուտ գաղութի ղեկավարության, ասված է դատարանի կայքում հրապարակված փաստաթղթերում:
Բողոքարկումների պատճառն այն էր, որ Նավալնիի փաստաբաններին թույլ չեն տվել տեխնիկական սարքավորումներ բերել նրա հետ հանդիպումներին:
