Տաջիկստանի նախագահը զինվորականներին հորդորել է բարձրացնել մարտական ​​պատրաստվածությունը՝ տարածաշրջանում անկայունության ֆոնին

Տաջիկստանի նախագահ Էմոմալի Ռահմոնը, երեքշաբթի ելույթ ունենալով հանրապետության անկախության 30-ամյակին նվիրված զորահանդեսին, դիմել է զինվորականներին՝ տարածաշրջանում անկայուն իրավիճակի պայմաններում մարտական պատրաստվածությունը բարձրացնելու կոչով: ՏԱՍՍ-ի հաղորդմամբ՝ այս մասին հայտնում է պետության ղեկավարի մամուլի ծառայությունը:

Ռահմոնը նշել է, որ վերջին շրջանում իրավիճակը տարածաշրջանում և աշխարհում լուրջ մտահոգություն է առաջացնում՝ կապված ահաբեկչական, ծայրահեղական և արմատական կազմակերպությունների գործունեության ընդլայնման, միջկրոնական հակամարտությունների, թմրանյութերի անօրինական շրջանառության, զենքի, կիբերհանցագործությունների և այլ անդրազգային կազմակերպված հանցագործությունների հետ:

«Այս պայմաններում զինված ուժերի, իրավապահ մարմինների և հատկապես սահմանապահ զորքերի ղեկավարությունը պետք է ձեռնարկի բոլոր անհրաժեշտ միջոցները՝ պետական սահմանի, հասարակական և պետական անվտանգության, մարդկանց խաղաղ կյանքի և զորամասերի ու ստորաբաժանումների մարտական պատրաստությունը բարձր մակարդակի վրա պահելու համար»,- ընդգծել է Ռահմոնը:

Նրա խոսքով՝ կանխատեսումների համաձայն՝ իրավիճակը տարածաշրջանում և որոշ երկրներում հնարավոր է՝ է՛լ ավելի սուր ու լարված լինի:

Ռահմոնը նշել է, որ պետությունն ու կառավարությունը ձեռնարկում են բոլոր անհրաժեշտ միջոցները՝ զինված ուժերի մարտունակության մակարդակը օրվա պահանջներին և ժամանակակից աշխարհի ծանր վիճակին համապատասխանեցնելու և երկրի պաշտպանունակությունը բարձրացնելու համար։ Այդ նպատակով նրանք օգտագործում են բոլոր ռեսուրսներն ու հնարավորությունները:

Իր խոսքում Տաջիկստանի առաջնորդը զինվորականներին հորդորել է «չկորցնել զգոնությունը, անընդհատ բարձրացնել պրոֆեսիոնալիզմի և մարտունակության մակարդակը, լինել օրինականության, կարգուկանոնի և ռազմական կարգապահության համապատասխանության օրինակ»:

Տաթև Ֆռանգյան