17.12.2025 | 16:05
ՆԱՏՕ-ի գլխավոր քարտուղարի տեղակալը վաղը Հայաստան կայցելի
Բախվել են բեռնատար գնացքն ու մարդատար ավտոմեքենան. զոհեր չկան
Հասարակություն
07.09.2021 | 14:01
2021 թվականի սեպտեմբերի 6-ին Սպիտակ-Վանաձոր վազուրդում գտնվող օրինական գծանցումում տեղի է ունեցել բեռնատար գնացքի և ավտոմեքենայի մասնակցությամբ վթար:
«Մերսեդես» մակնիշի ավտոմեքենան, որի վարորդը կոպտորեն խախտել է ճանապարհային երթևեկության կանոնները, դուրս է եկել ուղեփակոցով արդեն փակված երկաթուղային գծանց և բախվել գնացքին:
Զոհեր չկան, սակայն վարորդը և նրա ընտանիքի անդամները (երկու ուղևոր, այդ թվում՝ երեխա) տարբեր աստիճանի վնասվածքներ են ստացել, իսկ երեխան, Սպիտակի հիվանդանոցում առաջին բուժօգնություն ստանալուց հետո, տեղափոխվել է Երևան:
«Սա սեպտեմբերին գրանցված արդեն երկրորդ վթարն է երկաթուղային գծանցումներում և 13-րդը՝ տարեսկզբից: Բոլոր վթարները տեղի են ունեցել վարորդների կողմից թույլ տված ճանապարհային երթևեկության կանոնների կոպիտ խախտումների պատճառով: Հարկ է նշել, որ այս տարի ՃՏՊ-ների աճը նկատվում է ոչ միայն չարտոնված, այլև օրինական անցումներում: Ավելին, աճում է ցերեկը տեղի ունեցող վթարների թիվը:
Հարավկովկասյան երկաթուղին ամեն տարի էական միջոցներ է ներդնում երկաթուղային գծանցումներում անվտանգության մակարդակը բարձրացնելու համար, կանխարգելիչ աշխատանք է իրականացնում բնակչության շրջանում և երթևեկության անվտանգության կանխարգելման գործում համագործակցում է ՀՀ ոստիկանության հետ: Սակայն, ինչպես վթարների վիճակագրությունն է վկայում, իրավիճակը չի բարելավվում:
Ներկայումս վթարների մակարդակը ոչ միայն վտանգ է ներկայացնում մարդկանց կյանքի համար, հանգեցնում երթևեկության ժամանակացույցի խափանումների, այլև վտանգում է երկաթուղային տրանսպորտի աշխատանքը երկաթուղու առանձին հատվածներում»,- նշել է Հարավկովկասյան երկաթուղու գլխավոր տնօրենի տեղակալ, գնացքների անվտանգ երթևեկության գծով գլխավոր վերահսկիչ Սերգեյ Հարությունյանը:
ՀԿԵ-ն վարորդներին հորդորում է չխախտել ճանապարհային երթևեկության կանոնները:
«Դիմելով Ճանապարհային ոստիկանությանը, կոչ ենք անում երթևեկության կանոնները դիտավորյալ խախտող վարորդների նկատմամբ կիրառել ամենախիստ միջոցները: Սա կօգնի պահպանել ՀՀ քաղաքացիների կյանքն ու առողջությունը»,- նշված է հաղորդագրության մեջ:
