Քաղաքականություն
07.09.2021 | 09:53
ԱՄՆ -ը մտադիր չէ մոտ ժամանակներս Աֆղանստանի նոր առաջնորդներ ճանաչել արմատական «Թալիբան» շարժման ներկայացուցիչներին: Այդ մասին երկուշաբթի օրը հայտարարել է ԱՄՆ նախագահ Ջո Բայդենը, որը Սպիտակ տուն է վերադարձել հանգստյան օրերը Դելավեր նահանգի Ուիլմինգթոն քաղաքում անցկացնելուց հետո. հաղորդում է ՏԱՍՍ-ը:
Սպիտակ տանը լրագրողները հարց են ուղղել պետության ղեկավարին, թե արդյոք ԱՄՆ -ը պատրաստվում է ճանաչել թալիբների իշխանությունը Աֆղանստանում: «Ոչ: Դա դեռ շատ հեռու է», – պատասխանել է Բայդենը:
Անցյալ շաբաթ Սպիտակ տան խոսնակ Ջեն Փսակին ասել էր, որ ԱՄՆ վարչակազմը հրատապ անհրաժեշտություն չի համարում Թալիբանի ներկայացուցիչներին որպես Աֆղանստանի նոր առաջնորդներ ճանաչելու հնարավորության հարցը:
Հիշեցնենք, որ Թալիբանը լայնածավալ գործողություն սկսեց Աֆղանստանի վրա վերահսկողություն հաստատելու համար այն բանից հետո, երբ ԱՄՆ-ն գարնանը հայտարարեց իր զորքերը երկրից դուրս բերելու մտադրության մասին: Օգոստոսի 15 -ին Աֆղանստանի նախագահ Աշրաֆ Խանին հրաժարական տվեց և լքեց երկիրը, իսկ թալիբները առանց կռվի մտան Քաբուլ: Ամերիկյան զորքերը ամբողջովին լքեցին Աֆղանստանը անցած շաբաթ ՝ ավարտելով իրենց 20-ամյա ներկայությունը երկրում:
