Մշակույթ
06.09.2021 | 12:25
Երևանում «Դոմ Մոսկվի» մոսկովյան մշակութագործարարական կենտրոնի նախաձեռնությամբ Մոսկվայի 874-ամյակին նվիրված միջոցառումների շրջանակում կայացել է մեծ համերգ՝ նվիրված կոմպոզիտոր Առնո Բաբաջանյանի 100-ամյակին. տեղեկացնում են Երևանում «Դոմ Մոսկվի» մոսկովյան մշակութագործարարական կենտրոնից:
«7 երգ Մոսկվայի» մասին համերգը նվագակցում էր Հայաստանի ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր Էդուարդ Թոփչյանի գլխավորությամբ։
Հնչեցին կոմպոզիտոր Առնո Բաբաջանյանի հայտնի ստեղծագործությունները՝ «Գեղեցկության թագուհի», «Իմ Երևան», «Ոսկե տանգո», «Առաջին սիրո երգը», «Գիշերային Մոսկվայով» և այլ կատարումներ։
«Առնո Բաբաջանյանը Մոսկվային նվիրված իր բազմաթիվ ստեղծագործությունների միջոցով իր սերն էր արտահայտում Ռուսաստանի մայրքաղաքին։ Կատարումներ, որոնք ապրում են մինչև օրս և փոխանցվում սերունդներին», – նշեց «Դոմ Մոսկվի» կենտրոնի գլխավոր տնօրեն Վահրամ Կարապետյանը։
Կոմպոզիտորի ստեղծագործությունները կատարում էին Երիտասարդական օպերային ծրագրի մենակատարները՝ Ջուլիաննա Գրիգորյան, Տիգրան Մելքոնյանը, Տիգրան Հակոբյանը, Բելլա Ամարյան, Նավասարդ Հակոբյան, Լուսինե Մակարյանը և այլ տաղանդավոր արտիստներ։ Համերգի հատուկ հյուրը ՌԴ-ից երգիչ և կոմպոզիտոր Նիկոլայ Ռյաբուխան էր։
Համերգի երգիչներից Արթուր Աղաջանովը իր ելույթից հետո հուզիչ անակնկալ մատուցեց հանդիսատեսին և սիրելիին։ Բաբաջանյանի «Королева красоты» («Գեղեցկության թագուհի») երգը կատարելուց հետո ամուսնության առաջարկություն արեց իր ընկերուհուն, որը պատասխանեց՝ «այո»։
