Քաղաքականություն
03.09.2021 | 18:11
Եվրամիությունը և «Թալիբան»-ը կփոխգործակցեն՝ հանուն տեղի բնակչությանը աջակցություն ցուցաբերելու: Միևնույն ժամանակ, ԵՄ-ն քաղաքական առումով չի ճանաչի «Թալիբան»-ի ստեղծած կառավարությունը: Այս մասին հայտարարել է ԵՄ արտաքին քաղաքականության և անվտանգության հարցերի գերագույն հանձնակատար Ժոզեպ Բորելը, գրում է korrespondent-ը:
«Աֆղանստանի բնակչությանը սատարելու համար մենք պետք է փոխգործակցենք Աֆղանստանի նոր կառավարության հետ, ինչը չի նշանակում դրա քաղաքական ճանաչում: Սա միայն գործառնական երկխոսություն է»,- ասել է նա Սլովենիայի մայրաքաղաքում ԵՄ անդամ երկրների ԱԳՆ ղեկավարների ոչ պաշտոնական հանդիպման շրջանակում հրավիրված միջանկյալ ասուլիսի ժամանակ։
Բորելի խոսքով՝ ԵՄ-ն արդեն որոշել է 5 չափանիշ՝ «Թալիբան» շարժման հետ երկխոսություն զարգացնելու համար։ Դա, մասնավորապես, ահաբեկչության դեմ պայքարն է, մարդու իրավունքների պաշտպանությունը, հումանիտար հասանելիության ապահովումը և բոլոր ցանկացողներին երկիրը լքելու հնարավորություն տալը։
«Այդ երկխոսության խորությունը կախված կլինի վարչակազմի վարքագծից»,- ընդգծել է եվրոպական դիվանագիտության ղեկավարը։
Եվրամիությունը նաև որոշել է Քաբուլ վերադարձնել իր առաքելությունը՝ աշխատակիցների անվտանգության ապահովման պայմանով։
Տաթև Ֆռանգյան
