17.12.2025 | 23:17
ԵՄ-ն կոչ է անում Թբիլիսիին ազատ արձակել անօրինական ձերբակալվածներին
Առուշ Առուշանյանին գրավի դիմաց ազատ արձակելու միջնորդություն կներկայացվի դատարան
Հասարակություն
03.09.2021 | 13:18
Գորիս համայնքի ղեկավար Առուշ Առուշանյանի պաշտպանական թիմը խափանման միջոց կալանքը գրավով փոխարինելու միջնորդություն կներկայացնի դատարան։ Այս մասին տեղեկացնում է նրա պաշտպան Էրիկ Ալեքսանյանը։
Փաստաբանի համոզմամբ՝ դատավարության ներկա փուլում առկա են բոլոր նախադրյալները Առուշ Առուշանյանին գրավով ազատ արձակելու վերաբերյալ։ Թե խոսքը որ հիմնավորումների մասին է, Ալեքսանյանը կներկայացնի դատական նիստի ժամանակ։
Նշենք, որ քրեական գործով Առուշանյանի նկատմամբ ընտրված խափանման միջոցի փոփոխման հարցի քննարկումը տեղի կունենա սեպտեմբերի 10-ին՝ Սյունիքի մարզի ընդհանուր իրավասության դատարանի Գորիսի նստավայրում։
Հիշեցնենք՝ նախաքննական մարմնի հաղորդագրության համաձայն՝ «Հայաստան» դաշինքի ընտրական ցուցակի 32-րդ համարը զբաղեցնող Առուշ Առուշանյանն իր դաշինքի օգտին առավելագույն քվեներ ապահովելու և ընտրություններում ցանկալի արդյունք արձանագրելու համար նախապատրաստել է ծանր հանցագործություն, այն է` երկու և ավելի ընտրողի կաշառք տալը։ Ըստ մեղադրանքի՝ արտահերթ ընտրություններից մի քանի օր առաջ համայնքապետը հանդիպել է Քարահունջի վարչական ղեկավար Լուսինե Ավետյանին և առաջարկել ընտրություններից հետո դրամական օգնություն տրամադրել այն ընտրողներին, ովքեր կխոստանան ընտրել «Հայաստան» դաշինքին:
Ըստ ՀՔԾ-ի՝ հանցագործությունն ավարտին չի հասցվել Առուշանյանի կամքից անկախ հանգամանքներով, քանի որ Քարահունջի ղեկավար Ավետյանը հրաժարվել է ընտրողներին հանդիպելուց և նրանց դրամական օգնության տեսքով կաշառք տալուց:
