Գերմանիայում երկաթուղայինները հնգօրյա գործադուլ են հայտարարել

Գերմանիայի GDL մեքենավարների արհմիությունը սեպտեմբերի 2-ին ուղևորատար գնացքների հերթական գործադուլն է հայտարարել, որն արդեն երրորդն է դարձել օգոստոսի սկզբից։ Այս գործադուլն ամենաերկարն է լինելու վերջին շրջանում հայտարարվածների շարքում և տևելու է ավելի քան 5 օր: Գործադուլի պատճառով ամբողջ երկրում զգալիորեն սահմանափակվելու են երկաթուղային ուղևորափոխադրումները, գրում է DW-ի ռուսական ծառայությունը։

Բեռնափոխադրումների ոլորտի երկաթուղայինները գործադուլ էին սկսել սեպտեմբերի 1-ին՝ օրվա կեսին։

Միևնույն ժամանակ, Deutsche Bahn երկաթուղային կոնցեռնը կարծում է, որ վարորդների այս գործադուլի ընթացքում կարող է պահպանել միջքաղաքային երկաթուղիների մոտ 25 տոկոսը և քաղաքային ու միջքաղաքային գնացքների 40 տոկոսը:

Հունիսի սկզբին GDL-ն հայտարարեց աշխատանքային պայմանների բարելավման վերաբերյալ ամիսներ տևած բանակցությունների ձախողման մասին: Deutsche Bahn-ը, որը հատկապես տուժել էր կորոնավիրուսային ճգնաժամից և ջրհեղեղից, GDL-ին առաջարկեց աշխատավարձի բարձրացում երկու փուլով՝ 2022 թվականի հունվարի 1-ից 1,5%-ով և 2023 թվականի մարտի 1-ից 1,7%-ով: Սակայն արհմիությունն այդ պայմանները համարեց անբավարար:

Չորեքշաբթի Deutsche Bahn-ը նոր առաջարկներ է ներկայացրել արհմիությանը՝ գործադուլը դադարեցնելու հույսով. աշխատավարձերի աստիճանական բարձրացում 3.2%-ով, միանվագ մինչև 600 եվրո քովիդ-պարգևավճարներ և տարիֆային պայմանագրի ժամկետի կրճատում 40 ամսականից մինչև 36 ամիս: Սակայն այսօր առավոտյան արհմիությունը մերժեց այս առաջարկը և հայտարարեց գործադուլ սկսելու մասին։

Տաթև Ֆռանգյան