Քաղաքականություն
01.09.2021 | 14:11
Գերմանիայի ԱԳ նախարար Հայկո Մաասը կարծում է, որ Աֆղանստանի հետ կապված իրավիճակում շահագրգիռ կողմերը չպետք է հրաժարվեն թալիբների հետ անմիջական շփումներից:
«Անձամբ ես կարծում եմ, որ այլ ճանապարհ չկա, քան «Թալիբան»-ի հետ բանակցելը»,- ասել է նա Կատար կատարած այցի ընթացքում, գրում է DW-ի ռուսական ծառայությունը:
Մաասի խոսքով՝ անհրաժեշտ է կանխել Աֆղանստանում անկայունության առաջացումը, որը «կնպաստի ահաբեկչության աճին» և լրջորեն կազդի հարևան պետությունների վրա: Նա հավելել է, որ թալիբների հետ բանակցություններում խոսքը ոչ թե «ճանաչման պաշտոնական հարցերի», այլ գործնական խնդիրների լուծման մասին է, օրինակ՝ Քաբուլի օդանավակայանի հետագա աշխատանքի հարցի:
Միևնույն ժամանակ, արևմտյան երկրները, ըստ Մաասի, պահանջում են մի շարք պայմանների կատարում․ «Մենք բանակցությունների համար հստակ նախադրյալներ ենք առաջադրել՝ մարդու իրավունքների պաշտպանություն, մարդկանց համար մեկնելու հնարավորություն և որպեսզի ահաբեկչական խմբավորումները չապաստանեն Աֆղանստանում»:
Տաթև Ֆռանգյան
