Ռուսական ԶԼՄ-ներն իշխանություններին կոչ են արել դադարեցնել անկախ լրագրության դեմ ոտնձգությունները

Մի շարք ռուսական և ռուսալեզու լրատվամիջոցներ դիմել են Ռուսաստանի իշխանություններին՝ կոչ անելով դադարեցնել անկախ լրագրության դեմ արշավը: Օգոստոսի 27-ին համապատասխան հայտարարություններ են հրապարակել «Դոժդ» հեռուստաալիքի, «Նովայա գազետա»-ի, «Meduza»-ի, «The Village»-ի, «7 × 7»-ի, «Republic»-ի, «Պսկովի գուբերնյա»-ի, «Wonderzine»-ի, «Sota Vision»-ի, «Ստոլ»-ի, «Romb»-ի և «Forbes»-ի խմբագրություններն ու Լրագրողների և լրատվամիջոցների աշխատակիցների արհմիությունը:

«Լրատվամիջոցներին և քաղաքացիներին «օտարերկրյա գործակալներ» և «անցանկալի կազմակերպություններ» հայտարարելն ուղղակիորեն խախտում է Ռուսաստանի Սահմանադրությունը, ԶԼՄ-ների մասին օրենքը, Քրեական օրենսգիրքը, Մարդու իրավունքների համընդհանուր հռչակագիրը, որոնք երաշխավորում են ԶԼՄ-ների ազատությունը: Այս կարգավիճակները կա՛մ հանգեցնում են լրատվամիջոցների լուծարման, կա՛մ խտրական պայմաններ են ստեղծում նրանց աշխատանքի համար և ուղղակիորեն սահմանափակում լրագրողների մասնագիտական գործունեությունը»,- ասված է «Meduza»-ի հրապարակած կոչում:

Ռուսական և ռուսալեզու լրատվամիջոցների լրագրողները և խմբագիրները պնդում են «վերանայել լրագրողների դեմ քրեական և վարչական գործերն ու հետաքննել նրանց ծեծի և անօրինական հետապնդման դեպքերը»: Նրանք պնդում են հանրությանը տրամադրել «ամբողջական և համապարփակ տեղեկատվություն այն մասին, թե ով, երբ և ինչ պատճառով է անկախ մամուլի դեմ համաձայնեցված արշավ սկսել»:

Հայտարարությունը հասցեագրված է Ռուսաստանի Դաշնության նախագահ Վլադիմիր Պուտինին, ՌԴ Անվտանգության խորհրդի քարտուղար Նիկոլայ Պատրուշևին, ԱԴԾ տնօրեն Ալեքսանդր Բորտնիկովին, ՌԴ գլխավոր դատախազ Իգոր Կրասնովին, Քննչական կոմիտեի նախագահ Ալեքսանդր Բաստրիկինին և այլ պաշտոնատար անձանց։

Տաթև Ֆռանգյան