Քաղաքականություն
27.08.2021 | 14:31
ՄԱԿ-ի փախստականների հարցերով գործակալության աշխատակիցները, որոնք այցելել էին Լատվիա, փաստել են, որ Լատվիա-Բելառուս սահմանից անհետացել է 83 փախստական։ Այս մասին հայտնում է LETA-ն՝ հղում կատարելով «Ցանկանում եմ օգնել փախստականներին» կամավորական կազմակերպությանը, գրում է EADaily-ն։
Կազմակերպության ներկայացուցիչ Էգիլ Գրասմանիսը մտահոգություն է հայտնել, որ օգոստոսի 23-ի լույս 24-ի գիշերը՝ փախստականների հարցերով գործակալության ներկայացուցիչների այցի օրը, 83 մարդ անհետացել է սահմանից: Լատվիայի սահմանապահները որևէ կերպ չեն կարողացել բացատրել այս փաստը:
Գրասմանիսն ասել է, որ իր կազմակերպությունը սնունդ է գնել սահմանին արգելափակված մարդկանց համար, սակայն օգոստոսի 24-ին սահմանապահները հայտնել են, որ այն չեն կարող որևէ մեկին հանձնել, քանի որ մարդիկ չկան, իսկ օգոստոսի 23-ին ապաստան հայցողների հետ շփումը դադարեցվել է:
Կամավորները չեն հասկանում, թե ինչպես կարող էին մարդիկ միաժամանակ անհետանալ 4 տարբեր վայրերից։ Նա անհանգստացած է, որ նրանց արդեն մի քանի օր է՝ սնունդ չի հասցվել։
Ներգաղթյալների գտնվելու վայրի մասին վերջին տեղեկությունները կապված էին այն բանի հետ, որ Լատվիայի սահմանապահ ծառայության ներկայացուցիչները փախստականների խմբերից մեկին խնդրել էին տեղափոխվել այլ վայր՝ նրանց սննդի առաքումն ու բժշկական օգնության տրամադրումն ավելի դյուրին դարձնելու համար: Ներգաղթյալների հարազատները չեն կարողանում կապվել նրանց հետ և դիմել են կամավորների օգնությանը:
Լատվիայի Ներքին գործերի նախարարությունը LETA-ին հայտնել է, որ «անհետ կորածներին թույլատրել են մուտք գործել Բելառուսի տարածք»:
Տաթև Ֆռանգյան
