«Թալիբան»-ը Թուրքիային առաջարկել է զբաղվել Քաբուլի օդանավակայանի կառավարմամբ

«Թալիբան»-ը Թուրքիային առաջարկել է զբաղվել Քաբուլի քաղաքացիական օդանավակայանի կառավարմամբ։ Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Korrespondent-ը։

Միաժամանակ, ըստ Էրդողանի, թալիբները հայտնել են, որ իրենք կապահովեն օդանավակայանի անվտանգությունը։

«Թալիբներն առաջարկել են զբաղվել Քաբուլի օդանավակայանի կառավարմամբ։ Ո՞ւմ են առաջարկել։ Մե՛զ։ Ասում են, որ կապահովեն անվտանգությունը, սակայն ադմինիստրատիվ աշխատանքներով մեզ են առաջարկել զբաղվել»,- ասել է Էրդողանը։

Նրա խոսքով՝ Թուրքիան դեռևս այս առաջարկին չի պատասխանել։ Բացի այդ, նա տեղեկացրել է, որ Քաբուլում Թուրքիայի դեսպանատանը 3․5 ժամ տևողությամբ հանդիպում է տեղի ունեցել «Թալիբան»-ի ներկայացուցիչների հետ՝ հավելելով, որ, անհրաժեշտության դեպքում, դրանք կկրկնվեն։

Հավելենք նաև, որ չորեքշաբթի օրվանից Թուրքիան սկսել է իր Աֆղանստանից իր զորքերի դուրսբերումը։

Հիշեցնենք՝ հինգշաբթի երկու պայթյուն է գրանցվել Քաբուլի օդանավակայանի մոտակայքում, մեկը՝ «Բարոն» հյուրանոցի մոտ, որտեղ, ըստ մամուլի հրապարակումների, հավաքվել էին օտարերկրացիներ, այդ թվում՝ Մեծ Բրիտանիայի և ԱՄՆ-ի քաղաքացիներ: Առաջին պայթյունն իրականացրել է մահապարտ-ահաբեկիչը, այնուհետև մեքենայում պայթուցիկ նյութեր են պայթել:

Լրատվամիջոցները, վկայակոչելով «Իսլամական պետության» հայտարարությունը, հայտնում են, որ խմբավորումը ստանձնել է օդանավակայանի վրա հարձակման պատասխանատվությունը: Վաշինգտոնը կարծում է, որ հարձակումներում ներգրավված է եղել ԻՊ-ի կազմում ներառված «Վիլայաթ Խորասանը»: Ավելի ուշ Քաբուլում ևս մի քանի պայթյուններ են որոտացել, որոնց հետևանքով զոհվել է 60 մարդ, վիրավորվել՝ 1338-ը։

ԱՄՆ նախագահ Ջո Բայդենը հրահանգել է  հարվածներ նախապատրաստել «Վիլայաթ Խորասանի» ղեկավարների ու օբյեկտների դեմ։ Նա վստահեցրել է, որ «բոլորին կգտնեն ու կպատժեն»։

Տաթև Ֆռանգյան