Բայդենը հայտարարել է, որ պատասխանատվություն է կրում Աֆղանստանում տեղի ունեցածի համար ու խոստացել պատժել ահաբեկչությունների պատասխանատուներին

ԱՄՆ նախագահ Ջո Բայդենն ուղերձ է հղել Քաբուլում տեղի ունեցած ահաբեկչություննեի կապակցությամբ: Նա հայտարարել է, որ պատասխանատվություն է կրում Աֆղանստանում տեղի ունեցած վերջին իրադարձությունների, այդ թվում՝ Քաբուլի օդանավակայանում պայթյունների հետևանքով ամերիկացի զինծառայողների մահվան համար:

«Ես ամբողջությամբ պատասխանատվություն եմ կրում այն ամենի համար, ինչ տեղի ունեցավ վերջին շրջանում»,- ասել է նա։

Ջո Բայդենը նաև մեկ րոպե լռությամբ հարգել է Քաբուլի օդանավակայանի մոտակայքում պայթյունների հետևանքով զոհվածների հիշատակը՝ իր ցավակցությունները հայտնելով նրանց ընտանիքներին։

«Ես ձեզ խնդրում եմ միանալ ինձ մեկ րոպե լռությամբ՝ ի հիշատակ այն զինվորականների ու քաղաքացիական անձանց, ովքեր իրենց վերջին պարտքն են տվել»,- ասել է նա։

Բայդենն ընդգծել է, որ Քաբուլի օդանավակայանում հարձակման պատասխանատուները կհայտնաբերվեն ու կպատժվեն՝ հրահանգելով ԻՊ-ի զինյալներին հարվածելու պլան նախապատրաստել։

«Մենք կարձագանքենք ուժով և հստակությամբ այն ժամանակ և այն վայրում, որը մենք կընտրենք, և այն պահին, որը մենք կընտրենք»,- ընդգծել է երկրի ղեկավարը։

Նրա խոսքով՝ ԱՄՆ-ն ենթադրություններ ունի, թե ով է կանգնած պայթյունների հետևում: «Մենք չենք ների, չենք մոռանա: Մենք ձեզ կբռնենք և կստիպենք վճարել»,- ասել է ԱՄՆ առաջնորդը:

ԱՄՆ նախագահը նաև կարծիք է հայտնել, որ «Թալիբան» շարժումը չի օգնել ԻՊ գրոհայիններին և չի օգնի նրանց նաև ապագայում: Բայդենն ընդգծել է, որ Միացյալ Նահանգները չպետք է զոհի իր զինվորներին՝ Աֆղանստանում ժողովրդավարություն կառուցելու համար:

Նա նշել է, որ ԱՄՆ-ն թույլ չի տա ահաբեկիչներին միջամտել Աֆղանստանից տարհանմանը և որ հավատարիմ է մնում մինչև օգոստոսի 31-ը Աֆղանստանից ամերիկյան զորքերը դուրս բերելու իր որոշմանը: Բայդենը նաև հիշեցրել է, որ օգոստոսի 15-ից ԱՄՆ-ը Աֆղանստանից տարհանել է ավելի քան 100 հազար մարդու:

Հիշեցնենք, որ «Իսլամական պետություն» ահաբեկչական խմբավորումը ստանձնել է Քաբուլի օդանավակայանում տեղի ունեցած ահաբեկչության պատասխանատվությունը:

Տաթև Ֆռանգյան