22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
«Պոլիմետալ»-ը հետ է կանգնել Լոռու և Տավուշի անտառները վտանգող ծրագրի իր առաջին քայլից, բայց փաստ չէ, որ այդ որոշումը ժամանակավոր չի լինի․ բնապահպան
Հասարակություն
15.03.2018 | 15:56
Ռուսական «Պոլիմետալ» խմբի մեջ մտնող «Պոլիմետալ Արմենիա» ընկերությունը հայտարարություն է տարածել, որի համաձայն դադարեցնում է Լոռիում և Տավուշում երկրաբանահետախուզական աշխատանքների ծրագիրը:
««Պոլիմետալ Արմենիա» սահմանափակ պատասխանատվությամբ ընկերությունը տեղեկացնում է, որ առաջնահերթ կարևորելով իր գործունեության դրական հանրային ընկալումը, դադարեցնում է ՀՀ Լոռու մարզի Ալավերդի և Շնող, ՀՀ Տավուշի մարզի Նոյեմբերյան և Կողբ համայնքների վարչական տարածքներում երկրաբանահետախուզական աշխատանքների ծրագրի՝ շրջակա միջավայրի վրա ազդեցության փորձաքննության իրականացման և այդ գործընթացի շրջանակներում հանրային քննարկման կազմակերպման ուղղությամբ աշխատանքները»։
Բնապահպան Լևոն Գալստյանի խոսքով՝ դադարեցվել են առաջին փուլի աշխատանքները, իսկ թե արդյոք հետագայում ընկերությունում կփոշմանեն և կշարունակեն աշխատանքները, հայտնի չէ․«Այս փուլում ժողովրդի ձայնը, կարծիքը տեսնելով՝ «Պոլիմետալ»-ը հետ կանգնեց իր առաջին քայլից։ Բնականաբար, դա մասնավորապես տեղաբնակների և այդ տարածաշրջանի բնակիչների ակտիվության արդյունքն է։ Իսկ ինչ կանեն հետո՝ դա արդեն իրենցից պետք է ճշտել։ Բայց որպեսզի նրանք առհասարակ ձեռք քաշեն այդ մտադրությունից՝ պետք է ժողովուրդը իր կարծիքը հստակ արտահայտի հնարավոր բոլոր եղանակներվ»,- նշեց բնապահպանը։
Հիշեցնենք, որ «Ֆեյսբուք» սոցիալական ցանցում սկսվել էր ստորագրահավաք՝ ընդդեմ «Պոլիմետալ»-ի ծրագրի: Ստորգրահավաքին մեկ օրում միացել էր 1800-ից ավելի քաղաքացի:
Լիլիթ Շաբոյան
