Հասարակություն
24.08.2021 | 17:02Այսօր Գյումրու Մուշ թաղամասում երկու բնակարաններ նվիրեցին 44 օրյա պատերազմում զոհված զինծառայողներ Արամ Մկրտչյանի ու Հովհաննես Խաչատրյանի ընտանքիներին, որոնք բնակվում էին տնակներում։
Բնակարանները գնվել են ամերիկահայ բարերար Մանուշ Մամյանի, ինչպես նաև «Armenian Fund» ու «Ժոզեֆ և Ալիս Դորյանների» ընտանեկան հիմնադրամներիի միջոցներով։
Բնարականները երկու սենյականոց են՝ հիմնովին վերանորոգված ու կահավորված։
«Դորյաններ»-ի հիմնադրամը Գյումրիում պատրաստվում է նաև վերականգնողական ու տեղեկատվական տեխնոլոգիաների ուսումնական կենտրոններ հիմնել։ Շինությունն արդեն ձեռք են բերել և սկսելու են ներքին հարդարման աշխատանքները։ Այս մասին տեղեկացրեց «Դորյաններ»-ի հիմնադրամի տնօրենը Մինաս Արաբյանը։
Նա ասաց, որ հիմնադրամը Գյումրիում սոցիալական ծրագրեր է իրականացրել արցախյան պատերազմի ժամանակ, մասնավորապես աջակցություն է ցուցաբերվել Արցախից տեղահանված անձանց ու զինծառայողների ընտանիքներին։
Այսօր Գյումրու քաղաքային իշխանությունների ու բարերարների ներկայացուցիչների մասնակցությանմբ տեղի ունեցավ բնակարանների օրհնման արարողությունը։
Հովհաննես Խաչատրյանի այրին՝ Ջուլիետա Մելիքյանն ասաց, որ ամուսինը 9 տարի ծառայում էր ՀՀ զինված ուժերում, թեև 6 և 4 տարեկան տղաների հետ ապրում էին տնակում, ընդ որում վարձով, սակայն երջանիկ, հաշտ-համերաշխ ընտանիք էին։
«Երբ պատերազմը սկսվեց, ամուսինս արդեն դիրքերում էր։ Գնաց Ջաբրայիլ, ընկերները զոհվեցին, ամուսինս դիրքի ավագն էր, ընկերներին բերեց, հուղարկավորեց ու երբ խնդրեցի՝ էլ չգնա պատերազմ, կտրուկ մերժեց։ Ասաց՝ այնտեղ իմ ընկերներիս եմ թողել, 18 տարեկան տղաներ են կռվում, նստեմ, սպասեմ՝ թուրքը ե՞րբ պիտի հասնի։
Ամուսինս երազում էր երեխաներին հիփոթեքով տուն ու մեքենա վերցնելու մասին, հիմա իր երազանքը ես եմ կատարելու»,- պատմեց այրին՝ Ջուլիետա Մելիքյանը։
Արամ Մկրտչյանի այրին՝ Պառշկովա Ռեմն էլ ասաց, որ դուստրը ծնվել է ամուսնու զոհվելուց հետո՝ նոյեմբերի 9-ին․ նրանք երեք երեխաներ ունեն։ Նրանք ամուսիններով բնակվել են կնոջ մոր տանը՝ մտածելով, որ բնակարան երբեք չեն էլ կարողանա գնել, քանի որ ամուսնու աշխատավարձը շատ ցածր է, հազիվ կարողացել են երեխաներին պահել։
Արմիկ Մովսիսյան
