Քաղաքականություն
17.08.2021 | 17:10
Եվրախորհրդարանը մտավախություն ունի, որ Ռուսաստանն ու Չինաստանը կամրապնդեն իրենց դիրքերն Աֆղանստանում՝ այնտեղից ՆԱՏՕ-ի զորքերի դուրսբերումից ու «Թալիբների» ճնշման տակ երկրի իշխանությունների փլուզման ֆոնին։
«Եվրամիությունը պետք է նոր ռազմավարություն մշակի Աֆղանստանի ու ողջ տարածաշրջանի համար՝ հաշվի առնելով նոր հանգամանքները, քանի որ Ռուսաստանն ու Չինաստանը կարող են արագ փորձել լրացնել քաղաքական վակուումը»,- ասված է Եվրախորհրդարանի առաջնորդների հայտարարության մեջ, գրում է DW-ի ռուսական ծառայությունը։
Եվրապատգամավորների կարծիքով՝ Պակիստանին, Իրանին ու Հնդկաստանին անհրաժեշտ է կոչ անել Աֆղանստանում կառուցողական դերակատարություն ունենալ։ Նրանք այս «կրիտիկական ու դրամատիկ» իրավիճակի ֆոնին նաև բոլոր կողմերին կոչ են արել հոգալ ու կարգավորել Աֆղանաստանի օտարերկրյա քաղաքացիների ու աֆղանների տարհանումը, ովքեր ցանկանում են լքել երկիրը։
«Մենք բարոյական պատասխանատվություն ենք կրում բոլոր նրանց առջև, ովքեր աշխատել են ԵՄ կառույցներում, ՆԱՏՕ-ի ու միջազգային ու հասարակական կազմակերպությունների գործընկերներն են եղել»,- նշված է հայտարարության մեջ։
Հայտարարության հեղինակները նաև մատնանշել են, որ մարդասիրական ջանքերը գերակա առաջնահերթություն ունեն։
«Եվրամիությունը, այլ գործընկերների հետ միասին, պետք է անհապաղ ներգրավվի Աֆղանստանում հակամարտությունների, խաղաղ բնակիչների տեղահանման, սննդի պակասի, երաշտների և COVID-19 համաճարակի հետևանքով առաջացած հումանիտար ճգնաժամի լուծման գործին: Նոր միգրացիոն ճգնաժամի կանխումը բխում է մեր շահերից»,- ասված է Եվրախորհրդարանի ղեկավարների հայտարարության մեջ։
Տաթև Ֆռանգյան
