Սիսիանի համայնքապետը հրաժարականի դիմում է ներկայացրել․ նա կզբաղվի քաղաքականությամբ

ՀՀ Սյունիքի մարզի Սիսիան համայնքի ղեկավար Արթուր Սարգսյանը լիազորությունները վաղաժամկետ դադարեցնելու մասին դիմում է գրել։

Ինչպես Factor.am-ի հետ զրույցում նշեց Սարգսյանի պաշտպան Էմին Խաչատրյանը, համայնքապետը ցանկություն է հայտնել զբաղվել քաղաքականությամբ։

«Համաձայն օրենքի՝ ընտրվելով պատգամավոր, Արթուր Սարգսյանը պետք է ընտրությոuն կատարեր պատգամավորի և համայնքապետի պաշտոնի միջև, միասին համատեղել հնարավոր չէ։ Ուստի, պարոն Սարգսյանն ընտրեց պատգամավորի ուղին և այդ մասին դիմումն արդեն իսկ ուղարկվել է Սիսիանի ավագանու անդամներին։ Ամենայն հավանականությամբ, վաղվա նիստին կքննարկվի դիմումը»,- նշեց Խաչատրյանը։

Հիշեցնենք, որ Արթուր Սարգսյանն այս պահին կալանավորված է։ Ըստ ՀՀ քննչական կոմիտեի` վերջինիս դեմ հարուցված քրգործի դեպքն առնչվում է 2016թ. դեկտեմբերին Սիսիանի «էմմա Ասյանի անվան մանկական երաժշտական դպրոցի» շենքում ջեռուցման համակարգի տեղադրման աշխատանքների իրականացմանը: Քննության տվյալներով՝ գնման մրցույթում առավել ցածր գին առաջարկած մասնակցի փոխարեն հաղթող է ճանաչվել բարձր գին առաջարկած, համայնքի ղեկավարի հետ փոխկապակցված ՍՊԸ-ն։ Ընկերության հետ 2016թ. դեկտեմբերի 27-ին կնքվել է աշխատանքների կատարման գնման պայմանագիրը, իսկ վերջինս էլ նույն օրը ենթակապալի պայմանագիր է կնքել համայնքի ղեկավարի եղբորը պատկանող ՍՊ ընկերության հետ։ Այսպիսով, Սիսիան համայնքին պատճառվել է 3 631 050 դրամի գույքային վնաս:

Արթուր Սարգսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ (պաշտոնեական լիազորությունները չարաշահելը) և 314-րդ հոդվածի 1-ին մասերով (պաշտոնեական կեղծիքը)։

Ռոզա Վարդանյան