Թալիբները գրավել են Քաբուլը․ օդանավակայանում քաոսային իրավիճակ է, չվերթները դադարեցվել են․ ԼՈւՍԱՆԿԱՐՆԵՐ

2021 թվականի օգոստոսի 15 -ին «Թալիբան» շարժման զինյալներն առանց գրոհի մտել են Աֆղանստանի մայրաքաղաք Քաբուլ: Նրանք գրավել են մայրաքաղաքի կենտրոնում գտնվող նախագահական պալատը, գրում է BBC-ի ռուսական ծառայությունը:

Աֆղանստանի նախկին նախագահ Համիդ Քարզայը տեսաուղերձ է ձայնագրել. վերջինս հայտնվել է կադրում իր երեք փոքր դուստրերի հետ։ Նա Քաբուլի բնակիչներին հայտնել է, որ ընտանիքի հետ միասին կմնա ժողովրդի կողքին։

«Մենք հույս ունենք, որ մեր երկրի և մեր մայրաքաղաքի խնդիրները կլուծվեն բարի, խաղաղ ճանապարհով», – ասել է Քարզայը:

Մինչ այդ, Քաբուլի օդանավակայանում ևս իրավիճակը սրվել է։
Ականատեսներից մեկը հայտնել է, որ Քաբուլի օդանավակայանում, որը մոտ օրերս դառնալու է քաղաքացիների ու դիվանագետների տարհանման հարթակ, այս պահին խուճապ է։

«Այն բանից հետո, ինչ թռիչքների սրահում լուրեր պտտվեցին, որ օդանավակայան ժամանած պաշտոնյաների ու քաղաքական գործիչների համար գաղտնի կերպով թռիչքի անցագրեր են տպվում, քաոս է սկսվել։ Ես տեսել եմ 3 նախկին պատգամավորի, մի քանի փոխնախարարի ու հայտնի մարդկանց, որոնք հերթ էին կանգնած։ Նրանց մի մասն անգամ ամրագրումներ չուներ։ Մենք գրեթե 8 ժամ ենք սպասել, իսկ հետո օդանավակայանի աշխատակիցները սկսեցին հեռանալ։ Տարածվող լուրերի պատճառով քաոս սկսվեց։

Ուղևորներից ոմանք դուրս եկան օդանավակայանից, մյուսները վազեցին դեպի նստեցման դարպասները: Անձնագրային հսկողության խցիկներում ոչ ոք չկար, իսկ անցուղու արգելապատնեշները կոտրված էին:

Ուղեբեռի ստուգում նույնպես չկար, մենք պարզապես քայլեցինք դեպի դարպասները և տեսանք, որ դարպասների և ինքնաթիռների միջև ընկած մեծ ապակե դռները կոտրված են: Մարդիկ վազեցին դեպի վերջին օդանավը, առաջին ինքնաթիռը, որը մերն էր, արդեն մեկնել էր՝ լի պաշտոնյաներով:

Մեկ այլ թռիչք էլ կար, որին մարդիկ փորձում էին նստել: Հրմշտոց  սկսվեց:

Մենք վերադարձանք և տեսանք, որ շատ մարդիկ նստած են ինքնաթիռի թևերի տակ՝ թռիչքուղու մոտ՝ հույս ունենալով, որ նրանց համար ևս տեղ կլինի: Մարդիկ ցնցված էին. Նրանք վազում էին մի ինքնաթիռից մյուսը և չգիտեին ինչ անել»,- պատմել է իրավիճակին ականատեսներից մեկը՝ նշելով, որ այնուհետև օդանավակայանի անվտանգության աշխատակիցները սկսել են օդ կրակել՝ մարդկանց վախեցնելու համար։

Մինչ այդ, Քաբուլի օդանավակայանից միջազգային ավիաընկերությունների բոլոր ուղևորափոխադրումները ժամանակավորապես չեղյալ են հայտարարվել, հայտնել է ՆԱՏՕ -ի ներկայացուցիչը: Դաշինքի ուժերը ապահովում են օդանավակայանի անվտանգությունը:

Ներկայումս օդանավակայանից թույլատրվում է միայն ռազմական ինքնաթիռների թռիչքը:

Բրիտանական British Airways ավիաընկերությունը հայտարարել է, որ ժամանակավորապես դադարեցնում է Աֆղանստանի տարածքով բոլոր թռիչքները:

Տաթև Ֆռանգյան