31.10.2024 | 23:28
PKK-ի բարձրաստիճան ղեկավարն Անկարայի հետ խաղաղության նոր գործընթացը կապում է Օջալանի «ֆիզիկական ազատության» հետ
Թուրքիան,ինչպես Տիտանիկը խորտակվում է, մարդիկ հուսահատ դիտում են նավի նվագախմբի վերջին ելույթը․ թուրք դիվանագետ
Քաղաքականություն
10.08.2021 | 18:14
ԱՄՆ-ում Թուրքիայի նախկին դեսպան Նամըք Թանը հայտարարել է, որ Թուրքիան հիմա նման է նավի, որը փոթորկոտ ծովում կորցրել է ուղղությունը։ Դեսպանի հոդվածը ներկայացնում է Ահվալ գործակալությունը։
«Ցանկացածը, ով մի փոքր պատմություն գիտի, լավ հասկանում է, որ նավապետի համար դժվար է փրկել նավը խորտակումից։ Ինչպես Տիտանիկի աղետի դեպքում, հասարակությունը հուսահատ դիտում է նավի նվագախմբի վերջին ելույթը»,- գրում է թոշակի անցած դիվանագետը։
Վերջին երկու շաբաթվա ընթացքում անտառային հրդեհները տասնյակ հազարավոր հեկտար անտառներ են ոչնչացրել, զոհվել է 8 մարդ, հազարավոր մարդիկ ստիպված հեռացել են իրենց բնակավայրերից։
«Կապիտանի միակ նպատակը նավը ջրի երեսին պահելն է մինչև փոթորիկն անցնի, բայց նրան չի հուզում փոթորկի պատճառած վնասները»,- գրում է Թանը ՝ քննադատելով Թուրքիայի արտաքին գործերի նախարար Մևլութ Չավուշօղլուին։
Նախկին դեսպանի խոսքով՝ Թուրքիայի կառավարությունը հիասթափեցրել ու ցավի մեջ է թողել հրդեհներից տուժած օգնության սպասող քաղաքացիներին։ Նա նշում է, որ երկրի ԱԳՆ-ն կորցրել է իր ինստիտուցիոնալ ինքնությունը։
«Խորապես տխրում եմ՝ տեսնելով, որ ԱԳՆ-ն,որի անդամն եմ պատիվ ունեցել լինելու ու ծառայել եմ մոտ 40 տարի, օգտագործվում է գաղափարական նպատակներով»,-գրում է Թանը՝ նշելով, որ նախարարության պրոֆեսիոնալ կադրերը համակարգված կերպով փոխարինվում են նախկին քաղաքական գործիչներով։
Ըստ նրա՝ ԱԳՆ-ն աստիճանաբար կորցնում է իր կշիռը ու առաջնահերթությունը Թուրքիայում աշխատող օտար երկրների դիվանագետների աչքում։
Թանը նաև քննադատում է Չավուշօղլուին ՝ հրդեհների դեմ պայքարի համար ստեղծված թիմի աշխատանքներում ներգրավվելու համար․
«Արտաքին գործերի նախարարի հիմնական պարտականությունը մեր միջազգային հարաբերություններում առկա կոնկրետ քաղաքական խնդիրները լուծելն է։ Դժվար է պատկերացնել՝ ինչու է ԱԳ նախարարը կենտրոնանում այն խնդիրների վրա, որոնք իր պարտականություններից դուրս են, այն ժամանակ, երբ մեր արտաքին քաղաքականությունում գերիշխում է անհամապասխանությունը, երբ մենք ամեն հարցում լուրջ խնդիր ունենք, միջազգային ասպարեզում շատ երկրների հետ խնդիրները սպասում են լուծման»,- գրում է թուրք դիվանագետը։
Թանի խոսքով՝ Չավուշօղլուն փորձում է «պահպանել ուղևորների ու անձնակազմի բարոյական ոգին» հայտարարելով, որ «Մենք ուժեղ ենք ու ունակ հաղթահարելու ցանկացած մարտահրավեր» ։
Էմմա Չոբանյան
