15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Խնդրում եմ ձեզ չօգտագործել «կապիտուլյացիա» տերմինը․ Ռուբեն Ռուբինյան․ ՏԵՍԱՆՅՈւԹ
Քաղաքականություն
09.08.2021 | 17:34
Հայաստանը կապիտուլյացիայի չի ենթարկվել, չի հանձնվել: ԱԺ այսօրվա նիստում իր ելույթում այս մասին հայտարարեց Ազգային ժողովի փոխնախագահ Ռուբեն Ռուբինյանը։
«Այս ամբիոնից արդեն որերորդ անգամ հնչում է «կապիտուլյացիա» բառը։ Ինձ համար շատ զարմանալի է այս բառի կիրառումը։ Ես կուզեի պարզաբանենք, որովհետև կարծում եմ, որ «կապիտուլյացիա» բառը սխալ տերմին է, երբ նկարագրվում է 44-օրյա պատերազմի ավարտը կամ նոյեմբերի 9-ի եռակողմ հայտարարությունը։ «Կապիտուլյացիա» տերմինն ըստ էության նշանակում է անձնատուր լինել կամ հանձնվել։ Այն կարող է ենթադրել տարբեր բաներ, օրինակ՝ բոլոր տեսակի զինված ուժերի հանձնումից թշնամուն մինչև պետության գոյության դադարեցում, պետության օկուպացիա։
Համաձայնեք, որ Հայաստանի հետ դա տեղի չի ունեցել։ Հայաստանը 44-օրյա պատերազմի ավարտին չի հանձնվել, Արցախը չի հանձնվել, անձնատուր չի եղել, ՀՀ Զինված ուժերը կամ Արցախի ՊԲ-ն չեն դադարել գոյություն ունենալուց, չեն հանձնվել թշնամուն, կապիտուլյացիա տեղի չի ունեցել…
Տեղի է ունեցել պարտություն, և այդ պատության աչքերի մեջ պետք է նայել, պետք է առերեսվել այն փաստի հետ, որ մենք ունեցել ենք հսկայական մարդկային ու տարածքային զոհեր։ Բայց սա չի նշանակում, որ մենք ինքներս պետք է նսեմացնենք մեր պետությունը, որովհետև եթե ասում ենք, որ տեղի է ունեցել կապիտուլյացիա, դա նշանակում է, որ Հայաստանը հանձնվել է»,- ասաց Ռուբեն Ռուբինյանը։
Նրա խոսքով՝ ընդդիմադիրները Հայաստանի ղեկավարին համեմատում են Հիտլերի կամ Թալեաթի հետ։ «Սիրելի՛ գործընկերներ, գուցե մի օր թուրք-ադրբեջանական տանդեմին համեմատեք Հիտլերի կամ Թալեաթի հետ։ Ես, իհարկե, հասկանում եմ, որ դուք ընդդիմադիր եք, բայց եկեք չմոռանանք, որ որոշ դեպքերում դա վերածվում է սեփական երկրին ուղղված մեղադրանքի։ Եթե պատերազմի ժամանակ երկրի ղեկավար եղած անձին նմանեցնում ես մարդկության դեմ հանցագործություններ գործած անձանց հետ, դու քո երկիրն ես դրա մեջ մեղադրում անուղղակիորեն։ Խնդրում եմ, քննադատեք մեզ, բայց մի՛ մաքրագործեք մեզ վրա հարձակված հակառակորդին։ Մեր նախկին ղեկավարներից ոմանք վերջին հարցազրույցներում այնպիսի տպավորություն էին ստեղծում, որ Հայաստանն է հրահրել պատերազմ, Հայաստանն է հարձակվել ու ռազմական հանցագործություններ իրականացրել»,- նշեց Ռուբինյանը։
Մանրամասները՝ տեսանյութում:
