16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ե՞րբ եք հասցրել փոխել Սահմանադրության հոդված 14-ը․ Քրիստինե Վարդանյանը՝ Վլադիմիր Վարդանյանին․ ՏԵՍԱՆՅՈւԹ
Քաղաքականություն
09.08.2021 | 10:49
Հայաստանի Հանրապետությունում կա՞ն աշխարհագրական կետեր, որոնք դուք համարում եք ամայի տարածքներ։ Այս մասին այսօր Ազգային ժողովում «Քաղաքացիական պայմանագիր» խմբակցության պատգամավոր Վլադիմիր Վարդանյանին հարցրեց «Հայաստան» խմբակցության պատգամավոր Քրիստինե Վարդանյանը՝ մեջբերելով Վարդանյանի հայտարարությունից մի հատված:
«Ձեզ որ լսենք, չուտենք-չխմենք, լսենք, Հայաստանում իդեալականին մոտ վիճակ է, մի երկու իրավական խնդիրներ կան, որոնք կուղղենք, ու արդեն ամեն ինչ լավ կլինի։ Ցավոք, մենք ձեր ու ՔՊ-ի իրականությունում չենք։ Մայիսի 17-ին հանրային քննարկման ժամանակ ասել եք՝ մեր բանակը պաշտպանում է ժողովրդին, այլ ոչ թե ամայի որոշակի տարածքներ։ Խնդրում եմ՝ կոնկրետ ասել՝ ի՞նչ նկատի ունեք ամայի տարածքներ ասելով, նշել այդ աշխարհագրական կետերը, որոնք դուք համարում եք ամայի տարածքներ։ Երկրորդը, ե՞րբ եք հասցրել փոխել Սահմանադրության 14-րդ հոդվածը, որով ամրագրվում է, որ ՀՀ ԶՈԻ-երն ապահովում են ՀՀ-ի պաշտպանությունը, անվտանգությունը, տարածքային ամբողջականությունը և սահմանների անձեռնմխելիությունը»,- նշեց Վարդանյանը։
Վլադիմիր Վարդանյանը պատասխանեց, որ նոր իրավակարգավորումների պահանջն ավելանում է, և պետք է առաջ ընդանալ. «Ես երբեք վարդագույն ակնոցներով չեմ նայել իրավական ակտերին։ Հստակ հասկանում ենք, որ օրենսդրական գործընթացն անդադար է, որովհետև հասարակական հարաբերությունները զարգանում են, նոր իրավակարգավորումների պահանջ է ավելանում, և մենք պետք է ընթանանք առաջ»։
Անդրադառնալով «ամայի տարածքների» մասին հարցին՝ Վլադիմիր Վարդանյանն ընդգծեց. «Ես խիզախություն ունեցա որոշակի ուժերի անվանել հինգերորդ շարասյուն, որից հետո իմ խոսքից 10 վայրկյանանոց հատվածն առանձնացվեց ամբողջ նյութից և ներկայացվեց:
Տարածք, որը որևիցե մեկին չի պատկանում, այդ դոկտրինան ձեր ծանոթ պետք է լինի, խոսքը վերաբերում է կղզիներին, որոնք տեսականորեն կարող են առաջանալ հրաբուխից, ինչ-որ մի տեղ։ Ինչը վերաբերում է ՀՀ ԶՈՒ-երի դերակատարությանը, ապա 14-րդ հոդվածը ես չէ, որ պետք է վերացնեմ, ՀՀ ԶՈՒ-երը պետք է կատարեն իրենց սահմանադրական պարտականությունը, չի կարելի նենգափոխել իմ խոսքերը, չի կարելի է կոնտեքստից առանձնացնել իմ խոսքերը, չի կարելի ինձ մեղադրել նրա մեջ, որ ես, ըստ էության, կոչ եմ արել, որպեսզի մենք ունենանք ներքին կոնսոլիդացիա, որը հնարավորություն կտա էլ առավել արդյունավետ պաշտպանել մեր սահմանները»:
«ՀՀ պետական սահմանում գտնվող ցանկացած թուփ գտնվում է ՀՀ բանակի պաշտպանության ներքո»,- ընդգծեց Վարդանյանը:
Մանրամասները՝ տեսանյութում:
