14.12.2024 | 17:43
Հաստատվել է ՖԻՖԱ Աշխարհի 2026 թվականի առաջնության որակավորման փուլի խաղացանկը
Ո՞ր իրավական ակտի հիման վրա է Մարտի 8-ի կապակցությամբ 20 000-ից մինչև 200 000 դրամ նվեր-քարտեր բաժանվել. Զարուհի Փոստանջյանը հարցում է ներկայացրել
Հասարակություն
12.03.2018 | 14:29
Երևանի ավագանու «Երկիր Ծիրանի» խմբակցության նախագահ Զարուհի Փոստանջյանը դիմել է քաղաքապետարանի աշխատակազմի ղեկավարին՝ տեղեկություն ստանալու համար, թե որ իրավական ակտի հիման վրա է Մարտի 8-ի կապակցությամբ 20 000-ից մինչև 200 000 դրամ նվեր-քարտեր բաժանվել:
Երևան քաղաքի աշխատակազմի ղեկավար
պարոն Սերգեյ Մակարյանին
ՏԵՂԵԿԱՏՎՈՒԹՅՈՒՆ ՍՏԱՆԱԼՈՒ ՀԱՐՑՈՒՄ
Հարգելի պարոն Մակարյան,
Ղեկավարվելով «Տեղեկատվության ազատության մասին» օրենքի 6-րդ հոդվածի պահանջներով՝ խնդրում եմ տեղեկատվություն տրամադրել հետևյալի մասին.
«Կոռուպցիան Հայաստանում համարվում է էնդեմիկ և համատարած երևույթ, որը թափանցել է հասարակության բոլոր ոլորտները»:
Համաձայն Կոռուպցիայի մասին քրեական իրավունքի կոնվենցիաի` կոռուպցիան սպառնում է իրավունքի գերակայությանը, ժողովրդավարությանը և մարդու իրավունքներին, խարխլում է լավ կառավարումը, անաչառությունը և հասարակական արդարությունը, խեղաթյուրում է մրցակցությունը, խոչընդոտում է տնտեսական զարգացմանն ու վտանգում ժողովրդավարական հաստատությունների և հասարակության բարոյական հիմքերի կայունությունը:
Այն, որ Երևանի քաղաքապետարանը տարիներ շարունակ յուրացնում է հանրային միջոցները և մնում անպատիժ, ոչ մեկի համար գաղտնիք չէ: Սակայն այն փաստը, որ հանրային միջոցները որպես գումար-քարտ կարող են բաժանվել Երևանի քաղաքապետարանի աշխատակիցներին նվերի տեսքով մարտի 8-ի կապակցությամբ՝ բնութագրում է Տարոն Մարգարյանի կողմից հերթական ապօրինությունը և դիտվում է որպես կոռուպցիոն երևույթ:
Այսպես՝ 2018 թվականի մարտի 7-ին Երևանի քաղաքապետարանում բաժանվել են գումար-քարտեր, որը, ըստ շրջանարվող լուրերի, պարունակել է 20. 000 դրամից մինչև 200. 000 հազար դրամ:
Հիմք ընդունելով վերոգրյալը՝ խնդրում եմ տրամադրել պարզաբանում, որ իրավական ակտի հիման վրա է տեղի ունեցել 20.000 դրամից մինչև 200.000 հազար դրամ գումար-քարտի բաժանումը: Երևան քաղաքի բյուջեից որքա՞ն գումար է տրամադրվել այդ 20.000 դրամից մինչև 200.000 հազար դրամ գումար-քարտերի գնման համար: Ովքե՞ր են ստացել այդ 20.000 դրամից մինչև 200.000 հազար դրամ գումար-քարտերը:
Հարգանոք`
Զարուհի Փոստանջյան
Երևանի ավագանու «Երկիր Ծիրանի» խմբակցության նախագահ
