Մանախի գործի ելքը կորոշվի ըստ «Ելքի» վարքագծի՞․ դատավոր Պապոյանը պարբերաբար զբաղվում է «Ելքով»

Լուրեր

23.06.2018 | 15:18
Վարչապետը շնորհավորել է նախագահ Արմեն Սարգսյանին ծննդյան օրվա առթիվ
23.06.2018 | 15:00
Վայրի կենդանիները՝ հայ օլիգարխների խրախճանքի զոհ. ՏԵՍԱՆՅՈՒԹ
23.06.2018 | 14:16
Վերջին սոցհարցումների արդյունքները՝ Թուրքիայի արտահերթ ընտրություններից առաջ
23.06.2018 | 13:48
Ասկերանի «Միրզաջան» կոչվող տեղամասից հայտնաբերել են «Զինվորի  բաժին» գրառմամբ պահածոների դատարկ տարաներ
23.06.2018 | 13:28
Հակառակորդը հունիսի 17-ին Ակնայի ուղղությամբ հետախուզադիվերսիոն ներթափանցման փորձ է արել ու հետ շպրտվել. Արցախի ՊՆ
23.06.2018 | 13:23
Սիսիանի ԵԿՄ փոխնախագահն ու Որոտան գյուղի  մի բնակիչ Ռազմական ոստիկանություն են հանձնել մեծ քանակությամբ զենք, զինամթերք և զինվորական հանդերձանք
23.06.2018 | 13:15
Նախաձեռնելու եմ  «Սասնա ծռերի» և զոհված ոստիկանների ընտանիքների  հաշտեցում. Եղիշե Պետրոսյան. ՏԵՍԱՆՅՈՒԹ
23.06.2018 | 13:10
ՀՀ նախագահ Արմեն Սարգսյանը ծննդյան օրվա առթիվ շնորհավորանքներ է ստացել ՌԴ, Ղազախստանի ու Բելառուսի նախագահներից
23.06.2018 | 12:33
Վաշինգտոնում կտոնեն հայկական Վարդավառը. VOA
23.06.2018 | 11:56
Էթյեն Մահչուփյանը չի քվեարկի Թուրքիայի իշխող կուսակցության օգտին
23.06.2018 | 11:10
ՀՀ ԶՈւ զորմասերից մեկում պայմանագրային զինծառայող է մահացել
23.06.2018 | 11:06
Բակո Սահակյանը շնորհավորական ուղերձ է հղել ՀՀ նախագահ Արմեն Սարգսյանին` ծննդյան օրվա կապակցությամբ
23.06.2018 | 09:40
Դատավոր Արմեն Բեկթաշյանը կհրաժարվի՞ քննել հանցավոր խմբի գործը. «Ժողովուրդ»
23.06.2018 | 09:37
ՀՔԾ-ն բազմաթիվ հեռախոսազանգեր է ստացել Մարտի 1-ի դեպքերի վերաբերյալ. «Փաստ»
23.06.2018 | 09:33
Քառօրյա պատերազմի օրերին զինվորների օգնությունը պետք է ԱԻՆ-ը հասցներ. նոր հանգամանքներ. «Ժողովուրդ»
Բոլորը

Հայտնի Մանախի՝ Արթուր Այվազյանի և «Ելք» դաշինքի քարոզիչների միջև կոնֆլիկտի վերաբերյալ գործը անցյալ տարվա հոկտեմբերից Երևանի ընդհանուր իրավասության դատարանում է /Մալաթիա-Սեբաստիայի նստավայր/։ Դատավոր Ռոբերտ Պապոյանը ամիսը մեկ է կարողանում նիստեր նշանակել։ Մեկ փաստաբանները չկան, մեկ՝ դատախազը, մեկ՝ տուժողը։ Վերջին դատական նիստում Պապոյանը նույնիսկ դժգոհել է դատաքննության դանդաղ ընթացքից։

Հիշեցնենք, որ Մանախին, որը 14 տարի անցկացրել էր կալանավայրում, այս անգամ էլ մեղադրանք է առաջադրվել այն բանի համար, որ նա Անդրանիկի փողոցում / որտեղ վերջինս բնակվում է/«Ելք» դաշինքի համակիր Հայկ Սարգսյանի նկատմամբ բռնություն գործադրելով՝ «պահել է ապօրինի ձեռք բերած ատրճանակ՝ «անթաքույց արհամարհանք դրսևորելով հասարակության նկատմամբ» /բռնությամբ զուգորդված խուլիգանություն՝ Քր․ Օր-ի 258 հոդված, մաս երկրորդ, և ապօրինի զենք կրելը՝ 235 հոդված, մաս 1-ին/։

Դեպքը տեղի էր ունեցել ԱԺ ընտրություններից երկու օր առաջ՝ մարտի 31-ին, կենսգիշերին մոտ։ Այվազյանի լուսանկարը՝ արյունոտ, վնասված դեմքով, տարածվեց համացանցով մեկ։ «Ելքի» անդամներ Նիկոլ Փաշինյանը և Հայկ Սարգսյանը ոստիկանությանը հայտնել էին, որ Արթուր Այվազյանը հարձակվել է իրենց վրա քարոզչություն իրականացնելու ժամանակ, գողացել է իրենց դրոշները, ատրճանակ է պահել Հայկի վրա։ Մանախը հակառակն էր պնդում՝ որ տուժողը ինքն է, ոչ թե «Ելքի» երիտասարդը։ Նա վստահեցնում էր, որ ինքը չի հարձակվել, այլ ընդամենը նկատողություն է արել «Ելքի» «ջահելներին» եռագույնը գետնին գցելու համար։ Արդյունքում նրանք իրեն քարշ են տվել գետնով, մեքենայից կախված վիճակում, իսկ ատրճանակը իրենը չի։

Այվազյանին նախ կալանավորեցին, իսկ հուլիսին գրավի դիմաց ազատ արձակեցին։

Դատաքննությունն անվերջ ձգձգվում է

Դատավոր Ռոբերտ Պապոյանը մինչ օրս ընդամենը մեկ վկայի է հարցաքննել, այն դեպքում երբ գործով դատակոչված են մոտ երկու տասնյակ վկաներ։ Ավելի վաղ դատավոր Ռոբերտ Պապոյանը թույլ էր տվել տուժող Հայկ Սարգսյանին իր բիզնեսի գործերով մեկնել Հայաստանից դուրս, չնայած մյուս կողմի առարկություններին։ Նոր մեկնումը նոր առիթ է լինելու դատաքննությունը հետաձգելու համար։ «Ես գնացել եմ երկրից դուրս, վերադարձել եմ, և առաջիկայում կրկին մեկնելու եմ»,- մեզ հետ զրույցում նշեց Հայկ Սարգսյանը։

«Հավանաբար, նրանք խուսափում են էս դատերից»,- ասաց մյուս կողմը՝ Արթուր Այվազյանը՝ պնդելով․«Ըստ փորձաքննական եզրակացությունների, մատնահետքերը իմը չեն, զենքի վրա հետքեր չկան»։

Մինչդեռ «Ելք» -ի համակիր Հայկ Սարգսյանը Factor.am-ի հետ զրույցում պնդեց․ «Զենքի մեջի փամփուշտներից հայտնաբերել են նաև իր գրպանների մեջ, ինչը ապացուցում է որ իրենն է զենքը։ Բացի դա, մոտ 10 մարդ ցուցմունք է տվել, որ Մանախը այդ զենքը հանել է իր մոտից»։

Եթե իր բնույթով այլ մարդ լիներ, պոռնոգրաֆիայի տարածման մեղադրանք էլ կարող էին առաջադրել

Արթուր Այվազյանի պաշտպան Հայկ Ալումյանը զարմացած է․ «Նա տեսե՞լ է, շոշափել է այդ փամփուշտները։ Հավանաբար, նա հիմնվում է մեղադրանքի ձևակերպման վրա։ Փամփուշտները դրվել են նրա գրպանը։ Արթուր Այվազյանի շորերը վերցրել են, փաթեթավորել են, ուղարկել են փորձաքննության։ 30 փամփուշտի ծանրությունն ու ծավալը պատկերացնո՞ւմ եք։ Շորերը փաթեթավորելու պահին ոչ ոք չի հայտնաբերում դրանք, ոչ ոքի աչքը չեն ընկնում, ու միայն փորձագետը ասում է՝ գիտեք, շորերի մեջ փամփուշտներ կան։ Պոռնոգրաֆիկ նկարներ կարող էին գտնել, եթե իր բնույթով այլ մարդ լիներ, պոռնոգրաֆիկ նյութերի տարածման մեղադրանք կառաջադրեին, թմրամիջոց կարող էին գտնել շորերի մեջ։ Բայց Արթուրը կյանքում մի սիգարետ չի ծխել։ Քանի որ ավելի հեշտ էր զենքի հետ կապ ունենալու տպավորություն ստեղծել, փամփուշտ են գտել»։

Տպավորություն է, որ վերևներում այս գործի ելքը դեռ որոշված չէ։ Չի բացառվում, որ ինչ- որ պահի այն մահակ դառնա Նիկոլ Փաշինյանի և «Ելքի» գլխին, քանի որ, եթե պարզվի, որ Արթուր Այվազյանը զենքի հետ կապ չունի, ապա Նիկոլ Փաշինյանին կարող են սուտ մատնության համար մեղադրել։

«Ելքի» անդամ Սարգիս Ալեքսանյանը դատապարտվել է յուրացումների համար

Դատավոր Ռոբերտ Պապոյանն այնքան էլ վատ չի տրամադրված «Ելքի» երիտասարդների հանդեպ։ 2017 թվականին այս դատավորը, փաստորեն, պատժից ազատեց յուրացման համար մեղադրվող «Ելքի» անդամին։ Խոսքը «Ելքի» ակտիվ անդամ, Նիկոլ Փաշինյանի ընկերներից Սարգիս Ալեքսանյանի մասին է, որը անցյալ տարի նաև «Ելք» դաշինքի համապետական նախընտրական ցուցակի 66-րդ համարն էր։ Նա մեղադրվում էր այն բանի համար, որ աշխատելով «Սիս Նատուրալ» ՓԲԸ-ում, ընկերության դրամարկղ չէր մուտքագրել ու յուրացման եղանակով հափշտակել էր 1.589.049 դրամ՝ այդպիսով պատճառելով խոշոր չափերի գույքային վնաս։

Դատավոր Պապոյանը Սարգիս Ալեքսանյանին մեղավոր ճանաչեց ՀՀ քրեական օրենսգրքի 179-րդ հոդվածով՝ «Յուրացնելը կամ վատնելը», և նրա նկատմամբ պատիժ նշանակեց 5 տարվա ազատազրկման ձևով, որը, սակայն, կիրառեց պայմանական։ Այս գործից մեկ ամիս անց դատարան մտավ Մանախի գործը՝ կրկին «ելքականների» մասնակցությամբ։

Այսպես, մեր դատական համակարգը, որը անողոք է մանր հանցագործությունների դեպքում, ասենք, Ազատության հրապարակում տոնածառ տեղադրելու /Գևորգ Սաֆարյանի գործ/ , բավականին ներողամիտ է յուրացումների և խարդախության դեպքում։ Հնարավո՞ր է, որ ինչ -որ պահի Մանախի գործը մահակ դառնա «Ելքի» դեմ։ Մեր այս հարցին, ըստ քրեական գործի նյութերի, հարձակման ենթարկված Հայկ Սարգսյանը պատասխանեց․ «Ելքի գլխին այնքան մահակ կա, մի հատ ավել, մի հատ պակաս։ Մարդը հրազենով խուլիգանություն է արել, էլ չասեմ՝ մահափորձ, ու գրավի դիմաց բաց են թողել։ Դրանից հետո պարզ չի՝ ինչ ուղով է գնալու դատական պրոցեսը»։

Արթուր Այվազյանի փաստաբան Հայկ Ալումյանը համաձայն չէ այն պնդումների հետ, թե Մանախը իշխանության մարդն է։ «Այդ դեպքում նա կլիներ անձեռնմխելի», – ասում է փաստաբանը։ Այս գործով հաջորդ նիստը նշանակված է մարտի 20-ին։

Սյուզան Սիմոնյան