Քաղաքականություն
09.03.2018 | 16:48
Այս կիրակի՝ մարտի 11-ին, Հայաստանի 6 մարզերում կկայանան համայնքապետի ընտրություններ, իսկ Տավուշի մարզի Ազատամուտ համայնքում ավագանու արտահերթ ընտրություն։ Թեկնածուների շարքում չկան «Ելք» դաշինքը ներկայացնող թեկնածուներ, առաջադրվածների մեծ մասը ՀՀԿ-ից է։
Արագածոտնի մարզի Դդմասար գյուղում առաջադրվել է մեկ թեկնածու՝ ՀՀԿ-ական Ռաշիդ Օսեյանը, այլ թեկնածուներ չկան։ Համայնքապետի մեկական թեկնածուներ են նաև Արարատի մարզի հետևյալ գյուղերում․ Դարբնիկ՝ Դավիթ Գզիրյան, Եղեգնավան՝ Հովսեփ Ղազարյան, Խաչփար՝ Ղազար Մարտիրոսյան, Հայանիստ՝ Բալաբեկ Մարկիսյան, Նիզամի՝ Հարություն Կարապետյան։ Նշված թեկնածուներից միայն Եղեգնավանի թեկնածուն է անկուսակցական, մնացածը՝ ՀՀԿ-ից են։
Արարատի մարզի Նորամարգ գյուղի գյուղապետի պաշտոնի համար պայքարում են երեք թեկնածուներ՝ Արմեն Գևորգյան, Արման Թադևոսյան, Արսեն Ղահրամանյան։ Միայն վերջին թեկնածուն է անկուսակցական, մյուս երկուսը՝ ՀՀԿ-ից են։ Արարատի մարզի Սայաթ-Նովա գյուղում մեկ թեկնածու է՝ «Բարգավաճ Հայաստան» կուսակցությունից Ռազմիկ Ալավերդյանը։ Սիս գյուղի թեկնածուն Հանրապետական կուսակցությունից Արմեն Եղյանն է։ Արմավիրի մարզի Մեծամոր համայնքի մեկ թեկնածուն դարձյալ ՀՀԿ-ից է՝ Էդվարդ Միրզոյանը։ Չորս թեկնածու պայքարում է Լոռու մարզի Դեբեդ համայնքի ղեկավարի պաշտոնի համար․ Աշոտ Ղազարյանը՝ անկուսակցական, Յուրիկ Նազլուխանյանը՝ ԲՀԿ, Կամո Պետրոսյանը՝ ՀՀԿ, Արայիկ Սարգսյանը՝ ՀՅԴ։ Մեկական թեկնածուներ են Լոռու մարզի Լեռնավան գյուղում՝ Վաչագան Վարդանյանը՝ ՀՀԿ-ից և Կոտայքի մարզի Հացավան գյուղում Շավարշ Սարգսյանը՝ ԲՀԿ-ից։
Լիլիթ Շաբոյան
