Քաղաքականություն
03.08.2021 | 19:12
Թուրքիայի պաշտպանության նախարարությունը զորք է ուղարկել՝ անտառային հրդեհների դեմ պայքարում հրշեջներին օգնելու համար։ Այս մասին գրում է «Ահվալ» գործակալությունը։
Նախարարությունը հայտնում է, որ 400 զինծառայող է ուղարկվել տուժած շրջաններ, ինչպես նաև տեխնիկա՝ 4 ուղղաթիռ ու ավելի քան 50 հրշեջ մեքենա։
Կառավարությունից հայտնել են, որ երկրի հարավում տարածված հրդեհների մեծ մասը հաջողվել է մեկուսացնել։ Միլաս նահանգում՝ Բոդրումից հյուսիս-արևելք, կրակը դեռևս վերահսկողությունից դուրս է և արդեն սպառնում է տներին։
Թուրքիան հրդեհների դեմ պայքարում է ընդամենը մի քանի ինքնաթիռներով, ինչն էլ հարուցել է մարդկանց դժգոհությունը։ Հանգստյան օրերին Կառավարությունը դիմել էր ԵՄ-ին, որը 4 ինքնաթիռ է ուղարկել օգնության համար։ Մի քանի ինքնաթիռ էլ օգնության է եկել Ռուսաստանից ու Ադրբեջանից։
Նշվում է, որ Անթալիայից հյուսիս-արևելք գտնվող Գյոնդողմուշ քաղաքում հրշեջները մասամբ վերահսկողության տակ են վերցրել կրակը, իսկ ահա Միլասում իրավիճակը շատ լուրջ է։
«Կրակը հատել է կրիտիկական շեմը և հասել տներին։ Ակնհայտ է՝ դա տեղի կունենա։ Զայրույթից լաց եմ լինում»,- թվիթերյան իր էջում գրել է Միլասի քաղաքապետ Մուհամեդ Թոքաթը։
Նշենք, որ հրդեհները խլել են 8 մարդու կյանք, բացի այդ՝ սպառնում են երկրի զբոսաշրջային արդյունաբերությանը։ Թուրքիան ապավինում էր զբոսաշրջությունից ստացվող եկամուտներին՝ օգնելու տատանվող լիրային, որը վերջին 3 տարիներին կանոնավորապես նվազում է։ Որոշ զբոսաշրջիկներ արդեն լքել են տուժած շրջանները։ Երկրի հարավ-արևմուտքում գտնվող հյուրանոցներում զբաղվածության մակարդակը նվազել է մոտ 10 տոկոսով, նախնական ամրագրումներն էլ դադարեցվել։
Հավելենք, որ հրդեհներ են նաև Անթալիայից 60 կմ արևելք գտնվող Մանավգաթում, որը հայտնի է ինչպես տեղացիների, այնպես էլ օտարերկրացիների շրջանում։
Էմմա Չոբանյան
