ՌԴ ԱԳՆ-ն՝ Աֆղանստանում իրավիճակի կարգավորման գործընթացի և թալիբների հետ բանակցությունների մասին

Աֆղանստանում իրավիճակի կարգավորման բանակցությունները ցավոտ են լինելու, պետք է իրատես լինել։ Այս մասին հայտարարել է Աֆղանստանում ՌԴ նախագահի հատուկ ներկայացուցիչ, ԱԳՆ Ասիայի հարցերով երկրորդ դեպարտամենտի տնօրեն Զամիր Քաբուլովը, գրում է ՌԻԱ Նովոստին։

«Չպետք է սպասել սահուն գործընթացի, դա կլինի շատ ցավոտ գործընթաց։ Այո՛, մենք բոլորս դա հաշվի ենք առնում և լավ հասկանում, որ իրական դիվանագիտությունը հենվում է ոչ թե զգացմունքների, այլ շահերի ու հնարավորությունների վրա»,- ասել է Քաբուլովը Հանրային դիվանագիտության աջակցության հիմնադրամի կողմից կազմակերպված առցանց կլոր սեղանի ժամանակ:

Նա նաև հիշեցրել է թալիբներին, որ Մոսկվան նրանց հետ բանակցություններին մոտենում է պրագմատիկ կերպով, և նրանք «պետք է հասկանան տված խոստումը դրժելու արժեքը»։

«Երբ խոսքը գնում է բանակցությունների և տրված խոստումների մասին, ես շատ լավ հասկանում եմ մեզ տրված խոստման արժեքը, ինչպես նաև լավ հասկանում եմ, որ դա պահելու համար պետք է ոչ միայն հավատալ, այլև ստիպել, որ պահեն։ Մենք շատ պրագմատիկ ու սառնասրտորեն ենք իրերին նայում։ Եթե այդ կողմը, որը մեզ խոսք է տվել, որոշի այն խախտել, պետք է շատ լավ հասկանա դրա գինը։ Եվ Ռուսաստանը դա կցուցադրի իր ողջ ուժով, սակայն, միաժամանակ, նրբանկատորեն»,- ասել է Քաբուլովը։

Նշենք, որ Աֆղանստանում առճակատում է կառավարական ուժերի ու թալիբների միջև։ Թալիբներն արդեն գրավել են նշանակալի տարածքներ գյուղական բնակավայրերում և հարձակվում են խոշոր քաղաքների վրա։ Այս ամենը տեղի է ունենում երկրից ԱՄՆ զորքերի դուրսբերման ֆոնին։

Էմմա Չոբանյան