16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Արման Անտոնյանին դանակի 11 հարված են հասցրել
Հասարակություն
02.08.2021 | 13:29
ՀՀ քննչական կոմիտեի մամուլի խոսնակ Վարդան Թադևոսյանը մանրամասներ է հայտնել Երևանի ավագանու անդամ Արման Անտոնյանի վրա հարձակումից։
Factor.am-ի հետ զրույցում Թադևոսյանն ասաց․ «Դանակահարություն է տեղի ունեցել, նրան դանակի 11 հարված են հասցրել, Արման Անտոնյանն այս պահին գտնվում է հիվանդանոցում»։
Թադևոսյանի փոխանցմամբ՝ այս պահին քննիչները մեկնել են հիվանդանոց, առավել մանրամասն տեղեկություն կտրամադրվի, երբ նրանք վերադառնան։
Դեպքի առիթով գործ է հարուցվել ՀՀ Քրեական օրենսգրքի 147 (բնակարանի անձեռնմխելիությունը խախտելը), 118 (ծեծը) , 34-104-ի 2-րդ մասի 7-րդ կետով (մի խումբ անձանց կամ կազմակերպված խմբի կողմից սպանության փորձ)։
Հիշեցնենք, որ օգոստոսի 1-ին՝ գիշերը ժամը 1։00-ին մոտ մի քանի դիմակավորված անձինք մահակներով և դանակներով ներխուժել են Երևանի ավագանու «Իմ քայլը» խմբակցության անդամ Արման Անտոնյանի՝ Կոտայքի մարզում գտնվող տուն, դաժան ծեծի են ենթարկել և դանակահարել են նրան. այս մասին տեղեկացրել էր ավագանու նույն խմբակցության անդամ Արման Գալջյանը:
Արման Անտոնյանի վիճակը բժիշկները գնահատել էին ծայրահեղ ծանր, սակայն Երևանի ավագանու «Իմ քայլը» խմբակցության անդամ Գայանե Եղիազարյանը Factor.am-ի հետ զրույցում հայտնեց, որ Արման Անտոնյանի վիճակում այսօր արդեն դրական դինամիկա է նկատվել։
