02.05.2024 | 15:38
ՆԳՆ-ն՝ տավուշցիներին բռնությամբ բերման ենթարկելու մասին, ԱՄՆ կոնգրեսականները՝ Երևանին օգնելու և Բաքվին պատժելու կոչով․ ԼՈՒՐԵՐ
Թուրքիայում անտառային հրդեհների զոհերի թիվը հասել է 8-ի
Քաղաքականություն
01.08.2021 | 20:16
Թուրքիայում անտառային հրդեհների հետևանքով զոհվածների թիվը հասել է 8-ի, տուժածների թիվը հասել է 864-ի։ «ՌԻԱ Նովոստի»-ի փոխանցմամբ՝ հայտնել է հանրապետության առողջապահության նախարար Ֆահրետտին Քոջան:
Ավելի վաղ հաղորդվել էր անտառային հրդեհների վեց զոհերի և 410 տուժածների մասին:
«Մանավգատում (Անթալիայի նահանգ) բռնկված հրդեհների հետևանքով մենք ընդամենը յոթ զոհ ունենք։ Հրդեհից տուժած 507 մարդուց 497-ը դուրս են գրվել։ Մարմարիսում և Բոդրումում բռնկված հրդեհներից տուժած 203 մարդուց 186-ը դուրս են գրվել: Մարմարիսում մենք մեկ զոհ ունենք։ Մերսինում բռնկված հրդեհից տուժած բոլոր 154 անձինք դուրս են գրվել ապաքինվելուց հետո», – գրել է Քոջան Twitter-ում։
Թուրքիան արդեն հինգերորդ օրն է՝ պայքարում է լայնամասշտաբ անտառային հրդեհների դեմ։ Թուրքիայի նախագահը երկրում անտառային հրդեհներից տուժած շրջաններն աղետի գոտի է հայտարարել: Al Jazeera-ի փոխանցմամբ՝ Թուրքիայում անտառային հրդեհներն անկառավարելի են դառնում: Հազարավոր հրշեջներ միացել են հրդեհաշիջման աշխատանքներին: Թուրքիայի՝ Միջերկրական ու Էգեյան ծովերի ափերին գտնվող 17 շրջաններում արձանագրվել է կրակի մոտ 70 օջախ:
Կա ավելի քան 400 վիրավոր: Աղետի գոտում իրականացվում է բնակիչների ու զբոսաշրջիկների տարհանում:
Թուրքիայում հաջողվել է տեղայնացնել անտառային հրդեհների 112 օջախներից 107-ը։
Թուրքիայի նախագահ Ռեջեփ Էրդողանը երեկ՝ հուլիսի 31-ին, հայտարարել է կասկածյալի ձերբակալության մասին, որը կարող է մեղսակից լինել երկրում անտառային զանգվածների հրկիզմանը:
