ԵՐԵՎԱՆԻ ԺԱՄԱՆԱԿՈՎ․Պաշտոնյան պետք է ամաչի, որ չի գնում թատրոն․ Ժիրայր Դադասյան

«Մեր թատրոնի հանդիսատեսի շրջանում հայ պաշտոնյաներից տեսել եմ Ռոբերտ Քոչարյանին, երբ նա նախագահ էր, պարբերաբար տեսնում եմ Րաֆֆի Հովհաննիսյանին՝ իր տիկնոջ և ընկերների հետ, ինչպես նաև՝ մշակույթի նախարար Արմեն Ամիրյանին»,- Factor.am-ի «Երևանի ժամանակով» զրուցաշարի շրջանակում նշեց Երևանի մնջախաղի պետական թատրոնի գեղարվեստական ղեկավար Ժիրայր Դադասյանը։

Նրա խոսքով՝ մյուս պաշտոնյաները հավանաբար թատրոն այցելելու ժամանակ չեն ունենում կամ տեղեկացված չեն դաշտի նորություններից։ «Մե՛նք պետք է օրինակ ծառայենք պաշտոնյային, նա պետք է մի քիչ ամաչի, որ չի գնում թատրոն»,- ասաց Դադասյանը։

Նա անդրադարձավ նաև թատերարվեստում ռաբիսի, գավառամտության դրսևորումներին։«Անտերպրիզային որոշ ներկայացումներ բեմադրվում են КВН-ային մեթոդով, այդ ամենով դերասաններ չեն զբաղվում»,- շեշտեց գեղարվեստական ղեկավարը։ Շարունակելով ռաբիսի թեման՝ մենք հիշեցրինք, որ վերջին շրջանում վաստակավորի կոչում ստացավ նաև 6/8 կատարումներով աչքի ընկնող երգիչ Ռազմիկ Ամյանը։ «Ռազմիկ Ամյանն ինձ համար հրաշալի մի երգիչ է, համենայն դեպս ինքը ռաբիս չէ»,- վստահեցրեց մեր զրուցակիցը։

Factor.am-ի հարցին, թե որն է թատերական ոլորտին առնչվող այն խնդիրը, որի լուծումը մշակույթի նախարարությունից է կախված, Ժիրայր Դադասյանը պատասխանեց․ «Մշակույթի նախարարությունը պետք է շատ ուշադրություն դարձնի թատերական կրթությանը, հնարավորություններ ստեղծի ուսանողների համար, գուցե, համագործակցելով նաև Կրթության և գիտության նախարարության հետ։ Ի վերջո, մեր ապագան ուսանողներն են»։

Աննա Բաբաջանյան