15.11.2024 | 21:34
Փաշինյանը ՏՏ ոլորտում համաշխարհային ներդրման համար ՀՀ պետական մրցանակը հանձնել է Նարայանա Մուրթիին
«Կառավարության կառուցվածքի և գործունեության մասին» օրինագիծն առաջին ընթերցմամբ ընդունվեց
Քաղաքականություն
07.03.2018 | 15:10
Խորհրդարանն այսօր ձայների 63 կողմ, 32 դեմ հարաբերակցությամբ ընդունեց «Կառավարության կառուցվածքի և գործունեության մասին» ՀՀ օրենքի նախագիծը՝ կից օրենսդրական փաթեթով։
Դեմ քվեարկեցին ԱԺ «Ծառուկյան» և «Ելք» խմբակցությունները։ Նոր օրենքի համաձայն՝ կառավարությունը կազմված կլինի վարչապետից, առաջին փոխվարչապետից, երկու փոխվարչապետներից և 17 նախարարից՝ ներկայիս 18-ի փոխարեն: Այսինքն՝ այժմ գործող նախարարությունների շարքից դուրս էր մնացել Միջազգային տնտեսական ինտեգրման և բարեփոխումների նախարարությունը:
Երեկ նշված նախարարությունը ղեկավարող Վաչե Գաբրիելյանը նախարարությունը փակելու հետ կապված ուշագրավ բացատրություն էր տվել ասելով. «Ըստ էության, այն խնդիրը, որը դրված էր նախարարության վրա, արդեն կատարված է»:
Նախագծով ամրագրվում են նաև այն դեպքերը, երբ վարչապետը պարտավոր է հրաժարական ներկայացնել: Սահմանվում են ՀՀ կառավարության կազմը, կառուցվածքը և գործունեության կարգը` ՀՀ Սահմանադրության 147-րդ հոդվածին համապատասխան, ինչպես նաև կառավարության անդամների գործունեության երաշխիքները: Կառավարությունը կազմավորվում է վարչապետ նշանակվելուց հետո՝ տասնհինգօրյա ժամկետում: Իր նշանակումից հետո վարչապետը հնգօրյա ժամկետում Հանրապետության նախագահին է ներկայացնում առաջին փոխվարչապետի, փոխվարչապետների և նախարարների թեկնածու նշանակելու մասին գրավոր առաջարկություն:
Բացի այդ, նախատեսվում է կառավարության նիստերն անցկացնել դռնփակ, թեպետ վարչապետի որոշմամբ նիստի մի մասը կարող է ընթանալ դռնբաց:
Շողիկ Գալստյան
