19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Վրաստանում պատասխանատվության կենթարկեն ԵՄ-ի, ՆԱՏՕ-ի և բարեկամ պետությունների դրոշներն անարգելու համար
Քաղաքականություն
26.07.2021 | 23:06
Վրաստանում վարչական պատասխանատվություն է սահմանվել Եվրամիության, ՆԱՏՕ-ի և այլ միջազգային կազմակերպությունների դրոշները անարգելու համար, որոնց անդամակցում է Վրաստանը: Այս մասին գրում է «Գրուզիա օնլայն»-ը։
Բացի այդ, պատասխանատվության կենթարկվեն այն անձինք, որոնք կանարգեն պետական հաստատությունում կամ դրա դիմաց տեղադրված օտարերկրյա այն պետության դրոշը, որի հետ Թբիլիսին դիվանագիտական հարաբերություններ ունի։
Այսօր օրինագիծը քննարկվել է խորհրդարանի բյուրոյի նիստում: Նախատեսվում է Վարչական իրավախախտումների վերաբերյալ օրենսգրքում հատուկ հոդված սահմանել, համաձայն որի՝ վերը նշված գործողությունները նախատեսում են 1000 լարիի չափով տուգանք (300 դոլարից մի փոքր ավելի): Դրոշի անարգման գործողության կրկնությունը կհանգեցնի 2000 լարիի չափով (մոտ 650 դոլար) պատժի կամ վարչական կալանքի՝ մինչև 15 օր:
Օրինագծի նախաձեռնողները իշխող կուսակցության և ընդդիմության ներկայացուցիչներն են՝ խորհրդարանի խոսնակ Կախա Կուչավան և պատգամավորներ Ալեքսանդր Էլիսաշվիլին, Պրիդոն Ինջիան, Խաթունա Սամնիձեն, Նիկոլոզ Սամխարաձեն և Բադրի Ջափարիձեն:
Հիշեցնենք, որ հուլիսի 5-6-ն անկարգություններ էին տեղի ունեցել Թբիլիսիի կենտրոնում՝ Վրաստանի խորհրդարանի շենքի մոտ: Անկարգությունների մասնակիցները երկու անգամ պոկել են խորհրդարանի շենքի դիմաց տեղադրված ԵՄ դրոշը։
