Հույն զինվորականների հարցը վերաբերում է նաև Թուրքիա-Եվրամիություն հարաբերություններին

Հունաստանի պաշտպանության նախարար Պանոս Կամենոսը հայտարարել է, որ Թուրքիայում ազատազրկված հույն զինվորականների հարցը ազդում է ոչ միայն Հունաստան-Թուրքիա, այլև Եվրամիություն-Թուրքիա հարաբերությունների վրա։ Այս մասին նա խոսել է Բելգիայի մայրաքաղաք Բրյուսելում անցկացված Եվրամիության անդամ երկրների պաշտպանության նախարարների համաժողովի ժամանակ. տեղեկացնում է EH-ն:

«Հունաստանի զինվորականները միաժամանակ նաև Եվրամիության զինվորականներն են, ուստի այս հարցը վերաբերում է նաև Թուրքիա-Եվրամիություն հարաբերություններին», – նկատել է տվել հույն նախարարը։

Կամենոսը նշել է, որ թեմայի վերաբերյալ տեղեկություններ է հաղորդելու ՆԱՏՕ-ի գլխավոր քարտուղարի օգնական Ռոզ Գոթեմոլերին։ Նաև մանրամասնել է, որ պատահաբար թուրքական կողմ անցած հույն զինվորականները հույն-թուրքական սահմանին հետապնդելիս են եղել անօրինական փախստականներին և նրանց աջակիցներին։

Հունաստանի պաշպանության նախարարը առաջարկել է նաև, որ մինչև ռազմական դատարանի առաջ կանգնելը Թուրքիայում ազատազրկված հույն զինվորականները տեղափոխվեն Էդիրնեում Թուրքիայի դեսպանատուն։

Կամենոսն ընդգծել է, որ Հունաստանը և Թուրքիան, որպես ՆԱՏՕ-ի անդամներ, պետք է կարողանան նմանատիպ հարցերը խաղաղությամբ և բանակցային ճանապարհով  լուծել։

Հայտնի է դարձել նաև, որ Հունաստանի վարչապետ Ալեքսիս Ցիպրասը հեռախոսազրույց է ունեցել ՄԱԿ-ի գլխավոր քարտուղար Անտոնիո Գուտերեշի հետ։ Զրույցի ընթացքում այլ հարցերից բացի քննարկվել են նաև հույն–թուրքական հարաբերությունները և Թուրքիայում ազատազրկված հույն զինվորականների հարցը։ Հունաստանի վարչապետը Գուտերեշին  կոչ է արել միջամտել հույն զինվորականներին հնարավորինս արագ Հունաստան վերադարձնելու գործին:

Հիշեցնենք, որ մարտի 1-ին թուրք-հունական սահմանին գտնվող Էդիրնե անցակետում Թուրքիայի անվտանգության աշխատակիցները ձերբակալել էին 2 հույն զինվորականի։ Զինվորականները սահմանային Կաստանիես անցակետի աշխատակիցներն են, ովքեր եղանակային վատ պայմանների պատճառով մոլորվել էին և սխալմամբ անցնել թուրքական կողմ։