29.04.2026 | 17:01
ՄԱԿ-ը հայտնում է, որ Իրանում պատերազմի սկզբից ի վեր մահապատժի է ենթարկվել առնվազն 21 մարդ, ձերբակալվել՝ 4000-ը
«Վախենում ենք՝ մահանա»․ «Զոն նայողը» 25 օր է՝ հացադուլ է անում
Հասարակություն
05.03.2018 | 20:57
«Նուբարաշեն» քրեակատարողական հիմնարկի վարչակազմը չի միջամտում քրեական հեղինակություն Արկադի Պապյանի հացադուլին։ Նա արդեն 25 օր է, հացադուլի մեջ է և պահվում է հացադուլավորների համար նախատեսված խցում։ Արկադի Պապյանի հարազատները Factor.am-ին հայտնեցին, որ նա ծայրահեղ հյուծված է, հրաժարվում է դեղորայքից։ «Վախենում ենք, որ մահանա», – ասաց Արկադիի ընկերներից մեկը։
Հացադուլի 25 օրերին նրան ոչ ոք չի այցելել։ «Ոչ մեկին պետք չի, որ մարդը մահանում է», – ասում են հացադուլավորի հարազատները։ Արկադի Պապյանին «Վանաձոր» քրեակատարողական հիմնարկում կոռուպցիոն բացահայտումների վերաբերյալ քրեական գործի շրջանակներում մեղադրանք է առաջադրվել՝ առանձնապես խոշոր չափերով կաշառք տալու համար։
Դատախազությունը հաղորդել էր, որ փաստեր ունի, թե «Վանաձոր» ՔԿՀ-ի 10 պաշտոնյաներ հիմնարկի պետ Գևորգ Մկրտչյանի գլխավորությամբ առանձնապես խոշոր չափի՝ 2.750.000 ՀՀ դրամի, կաշառք են վերցրել «զոն նայողներից», որի դիմաց թույլատրել են թղթախաղը, արգելված իրերի և նյութերի մուտքը, խցերի դռներ են բաց թողել, և այլն։ Արկադի Պապյանը և մյուս հեղինակությունը՝ ազգությամբ եզդի Թամազ Ֆերոյանը իրենց ընկերների միջոցով փոխանցում են, որ իրենց դեմ առաջ քաշած մեղադրանքները շինծու են, որ «Վանաձոր» ՔԿՀ-ում խցերի դռները միշտ էլ որոշակի ժամերի բացվել են եւ որ իրենց դեմ ապացույցներ չկան։ Նրանք մեղադրանքը չեն ընդունում։
«Վանաձոր» ՔԿՀ պետ Գևորգ Մկրտչյանը նույնպես չի ընդունում իրեն մեղսագրվող արարքները և հրաժարվում է ցուցմունք տալուց։
Սյուզան Սիմոնյան
