31.10.2026 | 19:30
Թանկ ու թվային Հայաստան․ ինչ կփոխվի վաղվանից օտարերկրացիների համար․ ՏԵՍԱՆՅՈՒԹ
Գերմանիայի արևելքում ջրհեղեղների պատճառով զոհերի թիվը հասել է 20-ի, տասնյակ մարդիկ անհետ կորած են
Քաղաքականություն
15.07.2021 | 18:27
Գերմանիայի արևելքում ջրհեղեղների պատճառով առնվազն 20 մարդ է զոհվել, մի քանի տասնյակ մարդ անհետ կորել է։ BBC-ի հաղորդմամբ՝ այս մասին հայտնել են ոստիկանությունից։
Ջրհեղեղից ամենաշատը տուժել են Ռեյնլանդ-Պֆալցինա և Հյուսիսային Ռեյն-Վեստֆալիա նահանգները, որտեղ հեղեղվել են շենքերն ու մեքենաները: Երկու մարդ զոհվել է նաև հարևան Բելգիայում, Նիդերլանդները նույնպես մեծ վնասներ է կրել: Արևմտյան Եվրոպայում ռեկորդային քանակով տեղումներ են գրանցվել, ինչի պատճառով գետերի մեծ մասը դուրս է եկել հունից։
Երկրի կանցլեր Անգելա Մերկելը, որն ԱՄՆ-ում է՝ նախագահ Ջո Բայդենի հետ հանդիպելու համար, ասել է, որ «ցնցված է աղետից»:
Ռեյնլանդ-Պֆալցիայի նահանգի ղեկավար Մալու Դրեյերը նույնպես ջրհեղեղը «աղետ» է որակել:
«Կան զոհվածներ, անհետ կորածներ, շատերը դեռևս վտանգի մեջ են։ Մեր արտակարգ ծառայությունների բոլոր աշխատակիցները ներգրավված են շուրջօրյա աշխատանքներին և վտանգում են իրենց կյանքը»,- ասել է նա։
Շուրջ 70 մարդ անհետ կորած է համարվում Ռեյնլանդ-Պֆալցիայի Ահրվեյլեր շրջանում այն բանից հետո, ինչ Ահր գետը, որը թափվում է Հռենոս գետը, դուրս է եկել ափերից:
Ոստիկանական ուղղաթիռներ և հարյուրավոր զինվորներ են ներգրավվել փրկարարական աշխատանքներում: Ավելի վաղ ոստիկանությունը հայտնել էր, որ տասնյակ մարդիկ տանիքներն են բարձրացել՝ փորձելով այդ կերպ փրկվել:
Գերմանիայի արևմուտքում փակվել են դպրոցները, տրանսպորտային հաղորդակցությունը խափանված է։
Տաթև Ֆռանգյան
