Վերաքննիչ դատարանն ավարտեց Ռոբերտ Քոչարյանի գործով պաշտպանների և դատախազության միջնորդության քննարկումը

Վերաքննիչ քրեական դատարանում այսօր շարունակվեց ՀՀ երկրորդ նախագահ Ռոբերտ Քոչարյանի, Արմեն Գեւորգյանի, Սեյրան Օհանյանի և Յուրի Խաչատուրովի նկատմամբ ՀՀ քրեական օրենսգրքի 300.1-րդ հոդվածով դադարեցնելու մասին որոշման դեմ բողոքների գործով դատական նիստը:

Նիստը նախագահում է դատավոր Նարինե Հովակիմյանի՝ դատավորներ Սևակ Համբարձումյանի և Կարեն Մարդանյանի մասնակցությամբ։

Նախորդ դատական նիստին մեղադրող դատախազ Գևորգ Բաղդասարյանը միջնորդություն էր ներկայացրել՝ ՍԴ դիմելու և գործի վարույթը կասեցնելու վերաբերյալ։ Նիստի սկզբում մեղադրող կողմի միջնորդությանն անդրադարձավ պաշտպան Էրիկ Ալեքսանյանը, կարծիք հայտնելով, որ այս փուլում դժվար է որևէ որոշում կայացնելը․

«Նմանօրինակ գործելաոճն անթույլատրելի կլինի և կիմաստազրկի ողջ բողոքի քննությունը: Նշված միջնորդության վերաբերյալ որոշում պետք է կայացվի վերջում՝ բողոքների վերաբերյալ ակտի կայացմանը համատեղ: Ինչ վերաբերում է ՍԴ դիմելու հիմքերին, ապա դրանք առկա չեն ինչպես առաջին ատյանի դատարանում, այդպես էլ՝ այս պահին։ ՍԴ որոշումից հետո, երբ փաստացի ապաքրեականացվել է Քրեական օրենսգրքի 300.1-րդ հոդվածը, դատարանն ունեցել է իմպերատիվ պարտականություն՝ քրեական հետապնդումը դադարեցնելու և քրեական գործի վարույթը կարճելու մասին։ Դատախազությունը չի կարող օգտագործել դատարանը՝ հետագայում մեղադրանքը փոխելու համար»,- նշեց Ալեքսանյանը:

ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանն, իր հերթին, ընդգծել է, որ գործի քննության այս փուլում, քանի դեռ դատարանը չի անցել ներկայացված բուն բողոքների քննարկմանը և չգիտի՝ դրանց մեջ խնդիր կա՞, թե՞ ոչ, հնարավոր չէ բավարարել դատախազության սույն բողոքը։

Վերաքննիչ դատարանը, լսելով կողմերին, հեռացել է խորհրդակցական սենյակ՝ որոշում կայացնելու։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

Որոշումից հետո ՀՀ գլխավոր դատախազ Արթուր Դավթյանն այս գործով դիմեց Բարձր դատարան, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն ներկայացրին՝ քրեական գործի վարույթը կասեցնելու մասին, իսկ պաշտպանական կողմը՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու վերաբերյալ։