03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Փարիզում ոստիկանությունը ցրել է քովիդ-անձնագրերի դեմ բողոքի ցույցը․ ԼՈՒՍԱՆԿԱՐՆԵՐ
Քաղաքականություն
15.07.2021 | 14:06
Փարիզում Բաստիլը գրավելու 232-րդ տարեդարձի օրը կրկին բողոքի ցույցեր և անկարգություններ են գրանցվել, գրում է BBC-ի ռուսական ծառայությունը:
Այս անգամ ցուցարարները բողոքում էին Ֆրանսիայի նախագահ Էմանուել Մակրոնի՝ սրճարաններ, ռեստորաններ և կինոթատրոններ այցելությունները պատվաստումների վկայագրերի կամ կորոնավիրուսի թեստի բացասական արդյունքի վերաբերյալ վկայականների հիման վրա թույլատրելու ծրագրի դեմ:
Աղբյուրը նշում է, որ դատելով տեղի լրատվամիջոցներից ստացվող լուրերից ու համացանցում տարածվող տեսանյութերից՝ ցուցարարների թիվը հարաբերականորեն քիչ է եղել, սակայն իրենց բավականին աղմկոտ են պահել, շրջել են աղբամաններ, այրել դրանք, բախումների մեջ մտել ոստիկանների հետ։ Արդյունքում ոստիկանությունը ստիպված է եղել արցունքաբեր գազ կիրառել։
Նախագահ Մակրոնն այս շաբաթ հայտարարել էր, որ սրճարանները, բարերը, ռեստորանները, առևտրի կենտրոններն ու կինոթատրոնները պետք է այցելուների մուտքը թույլատրեն միայն պատվաստման մասին վկայականի կամ նոր արված կորոնավիրուսի բացասական թեստի հիման վրա։ Նրա խոսքով՝ դա արվում է կորոնավիրուսի նոր՝ «դելտա» շտամի դեմ պայքարելու համար։
Ցուցարարները կարծում են, որ սա ժողովրդավարության դեմ ոտնձգություն ու մարդու իրավունքների խախտում է նրանց հանդեպ, ովքեր չեն ցանկանում կամ չեն կարող պատվաստվել։ Սակայն ակնհայտորեն նրանց թիվը մեծ չի։ Մակրոնի այս հայտարարությունից հետո ֆրանսիացիները ռեկորդ են սահմանել․ մեկ օրում պատվաստման համար գրանցվել է 1,7 միլիոն մարդ։
Տաթև Ֆռանգյան
