19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ալիևը կրկին հայտարարել է, թե ԼՂ հակամարտությունը «մնացել է անցյալում»
Քաղաքականություն
13.07.2021 | 17:42
Ադրբեջանի նախագահ Իլհամ Ալիևը կրկին հայտարարել է, թե Լեռնային Ղարաբաղի հակամարտությունը համարում է կարգավորված։ Այս մասին նա ասել է Չմիավորման շարժման անդամ երկրների ԱԳ նախարարների մասնակցությամբ համաժողովի ընթացքում։
«Մենք ինքներս իրագործեցինք ՄԱԿ-ի Անվտանգության խորհրդի բանաձևերը, վերականգնեցինք տարածքային ամբողջականությունն ու պատմական արդարությունը։ Լեռնային Ղարաբաղի հակամարտությունը մնացել է անցյալում»,- ասել է Ադրբեջանի նախագահը, որի խոսքերն են մեջբերում ադրբեջանական լրատվամիջոցները։
Ալիևը նաև ասել է, որ Ադրբեջանը սկսել է Արցախի գրավյալ տարածքների վերականգնման գործընթաց։ Ալիևը բողոքել է նաև ականներից՝ նշելով, որ դրանք մնում են հիմնական խնդիրը։
«2020 թվականի նոյեմբերից այդ տարածքներում մոտ 30 քաղաքացի է մահացել, 100-ից ավելին վիրավորում ստացել ականի վրա պայթելու հետևանքով։ Միջազգային հանրությունը պետք է Հայաստանի վրա ճնշում գործադրի, որ Երևանը տրամադրի մեզ բոլոր տարածքների ականների քարտեզները»,- ասել է Իլհամ Ալիևը՝ նշելով, որ ականները հետաձգում են այդ շրջանների վերականգնման գործընթացն ու տեղահանվածների վերադարձը, և որ նման մեծ տարածքների ականազերծումը պահանջում է շատ ժամանակ ու ռեսուրսներ։
Բացի այդ, Ադրբեջանի նախագահը կրկին խոսել է այն մասին, որ 44-օրյա պատերազմի ընթացքում ՄԱԿ-ի Անվտանգության խորհրդի որոշ անդամներ փորձել են կողմանակալ հայտարարություններ ընդունել և դրանով, ըստ Ալիևի, անտեսել 1993թ․ ՄԱԿ-ի ԱԽ-ի բանաձևերը։
«Սակայն քննարկումների ընթացքում ԱԽ-ի Չմիավորման շարժման 7 անդամներ, որոնք սատարում էին Ադրբեջանի դիրքորոշումը, պնդել են քննարկվող տեքստում ավելացնել հղում Անվտանգության խորհրդի վերոնշյալ բանաձևերին»,- ասել է Ադրբեջանի նախագահը։
Էմմա Չոբանյան
