16.12.2025 | 15:10
ՀՀ ՊՆ-ն ԵՄ-ից 20 մլն եվրո կստանա // Թրամփը BBC-ից 5 մլրդ դոլար է պահանջում․ ԼՈՒՐԵՐ
ԵԱՀԿ ՄԽ-ն մերժեց Ալիևին. Բաքվում հիստերիայի մեջ են, Երևանում ողջունում են դեսպանների քայլը․ ՏԵՍԱՆՅՈՒԹ
Քաղաքականություն
12.07.2021 | 21:20
Հուլիսի 9-ին Ադրբեջանի կառավարության հրավերով Շուշի էին այցելել այդ երկրում հավատարմագրված 46 պետությունների դեսպաններ։ ԱՄՆ-ի, Ֆրանսիայի և Ռուսաստանի դեսպանները թեև հրավիրված են եղել, սակայն չեն մասնակցել շրջայցին։
Ադրբեջանի նախագահի արտաքին քաղաքականության գծով օգնականը տեղի ունեցածն անվանել էր «դեմարշ» և երեք գերտերություններին մեղադրել «հայամետ» դիրքորոշման մեջ։
Երևանում փորձագիտական շրջանակները երեք դեսպանների մոտեցումը հայկական կողմի համար դրական քայլ են որակում: Քաղաքագետ Ստեփան Գրիգորյանը ԵԱՀԿ Մինսկի խմբի համանախագահության երկրների դիավանագիտական ներկայացուցիչների՝ Շուշի չգնալը պայմանավորում է Արցախի կարգավիճակի հարցի լուծված չլինելով։
Դիվանագիտական կորպուսի այցը Շուշի կազմակերպվել էր Ադրբեջանի նախագահ Իլհամ Ալիևի անձնական հանձնարարությամբ: Եվ այժմ պաշտոնական Բաքուն չի թաքցնում իր վիրավորանքն ու դժգոհությունը ԵԱՀԿ Մինսկի խմբի համանախագահ երկրների դեսպանների դեմարշի նկատմամբ։
Ստեփան Գրիգորյանն ասում է՝ Բաքուն դիվանագիտական կորպուսի ներկայացուցիչներին տանելով Շուշի՝ ցանկանում է աշխարհին փաստի առաջ կանգնեցնել, ցույց տալ, որ ԼՂ հիմնախնդիր գոյություն չունի, սակայն, ըստ քաղաքագետի, այս առանցքային պետությունների դիվանագետների մերժումը կանգառի մեսիջ է՝ ուղղված Ադրբեջանին:
Ուշագրավ է, որ ԵԱՀԿ Մինսկի խումբը նախագահող Ֆրանսիայի, ԱՄՆ-ի և ՌԴ-ի դեսպանների մերժման ֆոնին՝ Երևանում նույն օրը տեղի ունեցավ Հայաստանի և Արցախի ղեկավարների հանդիպումը, որտեղ կողմերը պատերազմից հետո առաջին անգամ հրապարակային բարձրացրին Արցախի կարգավիճակի ճշգրտման խնդիրը:
Դիվանագետ Արա Պապյանի խոսքով՝ պատահական չէ, որ Հայաստանի և Արցախի ղեկավարները ԵԱՀԿ Մինսկի խմբի համանախագահության պետությունների դիվանագետների՝ Շուշի չգնալու օրը քննարկում են Արցախի կարգավիճակի հարցը: Ըստ նրա՝ սա Երևանից նրանց ուղղված հատուկ ուղերձ էր:
Արա Պապյանը, սակայն, կարծում է, որ հայկական կողմը չպետք է շատ ոգևորվի դեսպանների Շուշի չգնալու փաստից: Նա ուշադրություն է հրավիրում այն հանգամանքի վրա, որ, մասնավորապես, ՌԴ-ն Ադրբեջանին ԵՏՄ և ՀԱՊԿ կազմեր ներգրավելու ցանկություն ունի, և դեսպանների քայլը կարող է այլ ենթատեքստ ունենալ:
Ադրբեջանական լրատվամիջոցները խնդրի կապակցությամբ պարզաբանում են խնդրել նաև Ռուսաստանի դեսպանությունից, սակայն առայժմ պաշտոնական պատասխան չի հրապարակվել։ Թե ԵԱՀԿ Մինսկի խմբի համանախագահ պետությունների դեսպանների կողմից Ալիևին մերժումն ինչ առարկայական ազդեցություն կունենա Արցախյան խնդրի կարգավորման հարցում, ժամանակը ցույց կտա:
Մանրամասները՝ տեսանյութում։
Նարեկ Կիրակոսյան
